A Nupi A Phunzai Tuk i A Celh Tilo Ca’h Doctor Sin ah A Va Kal , Tidur Pakhat A Rak Pek i A Nupi A Dai Bak

Patung pakhat cu lungdong ngai le mithmai chia ngai in sibawi pa sin ah a va kal i “Ka nupi hi a thintawi tuk i kan nupa in kan buai lengmang , tu ah cun zeiti tuah awk ka thei ti lo i nangmah kan fuh tawp ko ruahnak na ka cheuhkhawh mi a um hnga maw ” tiah sibawi pa sin ah cun a va kal i bomhnak a va hal .

Sibawi pa nih cun hi ti hin a rak leh ve ” Nan inn ah nalawi than law na nupi a thinhun i a zai can buai nan i timh poah ah hi ti te hi na kaa ah va hmawm law na nupi a thin a dam hlan lo cu na ti hmawm mi cu na dolh hrim lai lo i a thin a dam i dai tein a um hnu lawng ah a dolh te lai tiah ” a ti i tithawl pakhat te cu a pek .

Sibawi pa nih a chimh bantuk te cun tithawl te cu ai put i an inn lei ah a lawi i , inn a phak bak cun a hlan bantuk cun a nupi cu a aipuang than hoi i a phunzai thluahmah i a pasal thatlo nak lawngte cu a chim rel than .Cubak cun sibawi pa nih a chimh bantuk te cun tithawl a pek mi cu a chin a hun i ti cu a kaa khat in a hmawm i holh lo tein a nupi kam ah cun a thu .

A nupi cu can tlawmpal a rauh ah cun battary a dawng mi bantuk in dai tein a um ve than .Cuti un a nupi a buai can poah ah sibawi pa pekmi ti te cu a ka cun aa hmawm lengmang i zarhhnih a rauh hnu ah sibawi pa sin ah cun a va kal than i “Sibawi pa na ka pek mi ti hi a mak tuk ee ka nupi a phunzai poah ah hi ti te hi ka hmawm i ka nupi cu a dai than colh peng i a hlan bantuk cun kan buai ti lo , hi ti hi zei bantuk ti ko hme a si ?” tiah lomhnak bia chim pah in khuaruah har ngai cun a hal .

Cu bak cun sibawi pa nih cun nih pah khin ” Unaupa kan pek mi ti kha zeihmanh asi ve hlei lo tidang bantuk sawhsawh a si ve ko . Na nupi a phunzai can i mah ti na hmawm tik ah khan nangmah zong kaa khat hmanh na holh kho ti lo i na nupi cu a mah lawng cun a phunzai huam cawk lo i a dai than tawn mi a si .

Minung hi khatlei lawng thinhun cun sau a deih bal lo i kutzong kapkhat lei lawng cun a aw a chuak kho lo pi ” tiah a rak leh .

Be the first to comment on "A Nupi A Phunzai Tuk i A Celh Tilo Ca’h Doctor Sin ah A Va Kal , Tidur Pakhat A Rak Pek i A Nupi A Dai Bak"

Leave a comment

Your email address will not be published.


*