A Nupi A Vuak I A Thah Hnuah Midang Nih Thah Mi Ban Tuk In Lem A Cang I A Hnu Ah An Theih Than

Myanmar ram ,Kachin ramkulh Banmaw khuapi Minkung vengi a cang mi thil a si i vanlong lehhmah zuar tu U Aung Zaw Myint nih cun a nupi cu amah bak nih a vuak i a thi nain, suamhmang nih an vuak i a thi mi bantuk in lem ai can ter i, hri in a rak i tem ter dih a hnu ah biahman cu an theih than.

October 30 zan nazi 11 hrawngah U Aung Zaw Myint nih cun amah bia a el lengmang tu a nupi cu fung in fakngain in a thuat i an coka ah a tlu. A nupi cu hliamhma faktuk a tuar caah a holh zong holh kho loh, mahte cawlcang kholo in a um.

Cuti cun U Aung Zaw Myint zong cu a nupi a vuak hnu cun a mah zong misual pawl nih an tuah mi bantuk in hti in a rak i tem ter dih ve ti a si. Inn cung i an fanu a rak tum i, apa hri in ai tem dih mi le, coka i a holh kho lo mi hliamhma faktuk tuar mi a nu a hmuh tik hna ah a lau tuk i a rianran nak in palik a chawnh hna.

Palik pawl an rak phanh cun, U Aung Zaw Myint nih cun an inn ah misual an rak lut i kanupi he an kan vuak hnu ah kan thingkuang an bauh i phaisa ting 20 an lak tiah a chimh hna. Palik pawl nih cun U Aung Zaw Myint le a nupi cu sizung ah rianrang tak in an phurh hna i, a nupi cu sizung ah a nunnak a liam.

Palik pawl nih cun misual kan theihtheinak dingah tiin U Aung Zaw Myint te i inn ka hram i, CCTV an zoh. CCTV ahcun Misual pathum U Aung Zaw Myint te i inn chung i an luh lio a um loh i,minung pakhat a luh lio long an hmuh.

Cupa zong U Aung Zaw Myint i kuttang mi Al Kyaing timi a si i palik pawl ih bia an hal tik ah, U Aung Zaw Myint nih hnawmhlonh a fial nak kong le a hnawmhlonh nak hmunhma cu a chimh hna. Hnawm a hlonmi cu palik pawl nih an cek tikah U Aung Zaw Myint nih a nupi thahnak i a hmanmi fung le thisen hnawhnak puanchia a si.

 

Cubak cun, U Aung Zaw Myint cu biahman an hal i a nupi he zanchiar bia an i el nak kong le an i hmuhthiam lo nak kong le indang an chuah nak kong bia ah an i sik lengmang ruang ah a nupi kha a lungdongh in a thah mi a si nak kong a chimh dih hna. Thil cang mi he pehpar in, U Aung Zaw Myint cu lainawng case an siam piak i, a kuttang pa zong biahman a chuah hlan chung poh palik pawl kutang ah an chiah rih ti a si.

Be the first to comment on "A Nupi A Vuak I A Thah Hnuah Midang Nih Thah Mi Ban Tuk In Lem A Cang I A Hnu Ah An Theih Than"

Leave a comment

Your email address will not be published.


*


error: Content is protected !!