A poi tak tak; AA ralkawp pawl nih Chin mi an kan tuah ning hi cu celhbak a si ti lo hi. Ngakchia thla 9 mi an thatnak kong le nungak an tlaihremnak kong tlingtein

AA ralkap pawl ruangah ngakchia sualnak zeihman a ngeih lo mi thla 9 bawhte cu a nunnak a liam. AA nih hi kongah hin kawl ralkap an si tiah kawl ralkap cu sual a puh hna bantuk in kawl ralkap zong nih AA an si tiah AA cu sual a puh ve.

Chin State Chungah a ummi Paletwa Township, Kyeelay khua-in Arakan Army nih mi 100 hrawng an fir hna tiah Khumi Affairs Coordination Council (KACC) member pakhat U Saw Mya nih a chim. January 11,2020-ah khan Chin State in Minister rak si tawnmi Salai Issac Khen nih facebook-ah a post ningah cun Chin State chungah a ummi Paletwa Township, Kyeelay khua-in mi 130 hrawng tapung pawl nih an tlaih hna tiah a langhter. Tapung pawl nih khuachung mino nungak pawl cu nuva sinak tuahpi an timh hna, khuachung upa pawl nih an kham hna ruangah a khamtu upa pawl cu tapung nih heh tiah an tuk an velh hna. Siphalung khua-ah cawnpiaktu riantlai U Arbay La le mi 2 an thi. Paletwa-ah thawngpang ttha a um kho rih lo.

KACC nih January 11, 2020-ah an langhterningah cun, liamcia zarhkhat hrawngah khan Arakan Army cu Kyeelay khua chungah an lut.  Arakan Army meithal keng pawl nih Chin nu pawl cu kan i tlaih hna lai tiah meithal he an hrocer hna. Khua chung upa nih an rak kham hna, a rak khamtu pawl cu AA pawl nih an rak tthuat colh hna. Kaladan Tiva pawngah mino pawl cu ni linhnak hmunah an pumh hna, Khua chungin a ho hmanh khua leengah chuah an sianh hna lo, ti le rawl an ei ding cu an umnak ramtang lei ah an phorhter hna.

“Arakan Army nih sualnak zeihmanh a ngei lomi an tlaih hna, khua chung nu sinah  nuva sualnak an tuahmi cu a pawi taktak, zaangfahnak lungthin zong an ngei lo. Hi bantuk sualnak a tuahtu hna sinah dantatnak pek hrimhrim awk a si,” tiah AA tuahserning cu sual a si tiah an langhter. “Zaang en in i tinak hi kan cohlan bal lo, hi bantuk zaang en in i tinak he pehtlaihnak a ngeimi le tuahtu hna cu official nih an hrem awk a si,” tiah KACC member a simi U Saw Mya nih a ti.

Kyeelay khua hi Paletwa Township chaklei 12 miles hrawng hla-ah a ummi a si, Kaladan tiva in tlun khawh le phanh khawh zong a si fawn. Chin State chungah a ummi Paletwa Township chungah khua cheukhat pawl cu myanmar ralkap le Arakan Army i tuk ruangah harnak tampi an ngei. I tuknak ruangah mah le umnak khua a chuahtak mi zong an tam deuh deuh tiah langhter a si.

Be the first to comment on "A poi tak tak; AA ralkawp pawl nih Chin mi an kan tuah ning hi cu celhbak a si ti lo hi. Ngakchia thla 9 mi an thatnak kong le nungak an tlaihremnak kong tlingtein"

Leave a comment

Your email address will not be published.


*


error: Content is protected !!