A poi tak tak!! Zawtnak ttih nungtuk mi a rak chuahnak Wuhan ah Chin mi panga dirhmun cu zaangfah an si tuk cang

Kan theih cia bantuk in China Wuhan khualipi in a thawk mi zawtnak cu ttih a nung chin lengmang cang. Atu hi mizaw a zohkhentu sibawi tiang an thih cang. Sibawi (doctor) hi Coronavirus um tamnak bik Hubei Province i a ummi le Hubei Xinhua Hospital ah a ttuanmi a si, zawtnak a ngeimi hna zohkhenhnak rian a ttuan biktu zong a si, sihmanhselaw, a zohkhenhmi hna mizaw in zawtnak hi a ngei, a thih ah hin kum 62 upa a si tiah an langhter.

Mizaw hna damnak caah a fimthiamnak he rian a ttuan, sihmanhselaw, a donghnak ahcun amah zong a thi, cucaah, mi tampi nih upatnak an pek, midang damnak caah a nunnak tiangin a pemi a si tiah theih zungzal a si cang lai. Wuhan khuapi Seafood Market rian ttuan hna sin in hi zawtnak tihnung coronavirus hi December 31-ah khan theih a si, Coronavirus hi khuazei in dah a rat timi cu theih khawh a si rih loh, sihmanhselaw, Media pawl nih an zumhning an chimmi pakhat cu, Chinese miphun pawl nih hin papalak chumhmi hang an din tawn caah hi zawtnak hi a ummi a si kho men tiah an langhter.

South China Morning post nih a langhterning ahcun, minung 2,000 hna cu coronavirus zawtnak ruangah zohkhenh cuahmah an si, sihmanhselaw, China nih hin bia dik a phuan tawn lo caah an langhtermi naak tam nih zawtnak an ngei kho men tiah chim a si. ATP News nih a langhterning ahcun, a thimi zong minung 50 an tling cang, WHO balte nih corona-virus zawtnak ttihnung ruangah ralrinnak (global health emergency) an phuang duh rih loh, sihmanhselaw, tthatein dothlatnak balte an kalpi cuahmah lio a si.

Atu hi Wuhan City ah Chin mi panga cu khua kal tak kho lo in an um tiah theih a si. Aruang cu, Wuhan khua chungah um mi poah cu khuadang ah chuak lo ding in china cozah nih a ti hna. Vanlawng, motor zong in si seh, Wuhan khualipi hi chuahtak a siang lo, Aruang cu Wuhan hi zawtnak a chuahnak hmun bik a si caah, Wuhan city ah hin Chin mi ca a cawn lio mi panga an um hna. Cozah nih Wuhan khualipi ah um mi cu Wuhan kaltak a siang lo caah chuak kho lo in Wuhan ah an um rih ko tiah theih a si. Atu hi lenglei zong chuak ngam lo in an um tiah theih asi

Be the first to comment on "A poi tak tak!! Zawtnak ttih nungtuk mi a rak chuahnak Wuhan ah Chin mi panga dirhmun cu zaangfah an si tuk cang"

Leave a comment

Your email address will not be published.


*


error: Content is protected !!