A poi tuk hringhran. Myanmar nupawl singapore le Bangkok an kal duhnak ruang an chimh mi cu fih a nung tuk ko ee

Vietnamese miphun hna UK an kal duhnak a ruang theih tikah ram hruaitu an rak biapitning a fiang ngaingai, thanchohnak zong hi a ttha tuk ko nain mikip caah a si loah cun tthatlonak a rak chuahpitu zong a si. Vietnam ramah cun mitthli tlaknak le lungrawhnak theih ding tampi a um cuahmah, Lorry trailer chung i a thimi hna kha an rammi an si maw! tiah theihnak a um kho rih lo, dothlat cuahmah a si rih.

A thlithup in minung chawleh thalnak caah a hmangmi pawl dohnak caah rian a ttuanmi, Anti-trafficking charity pakhat nih an chimningah cun, phungning loin UK ram kal aa tiimmi hna hi Vietnam ramah theih ding tampi an um cang. Zeicaah, nunnak tiangin a ttihnung timi thei ko hna hmanhselaw UK ram i luh an duhnak a ruang bik hi a si?

“Vietnam ram hi economics ah a tthangcho bakmi a si, sihmanhselaw, a tthanchohning belte cu rammi dihlak nih an ting co lo, mikip nih an ram economics tthanchohnak in a miaknak an hmuh lo caah rianttuantu (labours) zong rel cawk lo an um,” tiah Vietnam ram i BBC head rian tlai Giang Nguyen nih a chim. UN nih a langhterningah cun, an ram in sifahnak donghter thluahmah an timhmi nih rammi dihlak hna cu miaknak a pe hna lo, hmun cheukhat cu tthanchohnak nih a pal hna lo.

“Europe le UK ah a kalmi Vietnam miphun pawl cu an miphun hna umnak ah an kal i, rianttuan ding an kawl dih hnuah an tangka hmuhmi cu an chungkhat le an kuat tthan tawn hna,” tiah anti-traficking kong a theihngalmi pakhat nih a chim. Dothlatnak in an hmuhmi pawl an langhterningah cun, kum khat chungah Vietnam rammi 18,000 hna cu, smugglers pawl nih a thlithup in Europe ram an luhnak caah an bawmh hna, USA ram zongah tam lak an luhpi cang hna.

UK ram an kal duh biknak a ruang cu, rian hmuh a fawi ruangah le, lahkhah a tthat ruangah a si, tangka tampi an hmuhmi in an kaltakmi an chungkhar le an bawmh khawh tawn caah a si. UK ramah hin, Vietnamese miphun tampi an um cang, anmah tein community zong an dirh i, a ra tharmi pawl cu rian an kawl piak hna pinah, umnak tiangin an tuaktan piak dih hna. Cucaah, UK an kal duh biknak a ruang pakhat a si.

UK ram in Vietnam ramah a kir cangmi pakhat nih a chimningah cun, “mi tampi cu lo ah le nga tlaihnakah an i hlawhfa, caan aa thlen bantukin rian kan ttuanmi zong kan thlen caan tampi a um, a thlithup i kalnak lam hi a um zong ka thei bak ti lo, sihmanhselaw, a thlithup in kal aa tiimmi hna cu an nunnak an thaap dih a hau men lai,” tiah a ti.

Nungak pakhat, Vu nih a chimningah cun, a thlithup in UK kalnak caah hin tangka tam taktak dih a hau, minung pakhat nih $10,000 in $15,000 an dih tawn, an kalnak lam hi a fawi bak lomi a si, a caanah cun a thlithup in tupi an pal a hauh caan zong a um. Sihmanhselaw, a thlithup kalnak caah tangka $40,000 in $50,000 a ngeimi hna cu vanlawng in an kal tawn. Vietnam ramah cun, tangka $30,000 ngei dingin kum 30 hrawng rian an ttuan a herh, sihmanhselaw, UK ram an phanh khawh ah cun, fawitein an hmuh khawhmi a si, cucaah, hibantuk in minung tampi a thlithup in an kal duhnak a ruang hi a si tiah Vu nih a chim.

UN nih a langhterningah cun, a thlithup in Europe ram kalnak caah Vietnamese miphun pawl nih kum chiarte smugglers sin i an tangka dihmi dihlak cu, $300 million leeng a si. Ramdang kalnak caah tangka a ngei lomi zong nih, an chungkhat le hna cu tangka an cawi hna, micheukhat cu an kal man pek piak dih hna i, an kalnak ram an phanh dih hnuah a karh in an tangka hmanmi cu an vun pek tthan tawn hna.

“A caanah cun ramdang kal an i timhnak cu a hlawhtling lo, sihmanhselaw, a karh in tangka hmanter an si caah, timhlamhnak an ngei tthan tawn, Vietnam chungkhar cheukhat nih an ruahningah cun, cubantuk ramdang kalnak cu an fa le caah a ttha bikmi a si tiah an ruah,” tiah Dr Barber zong nih a chim. Independent Anti-slavery Commioner nih dothlatnak in an hmuhmi an langhterning ah, a thlithup in ramdang kalnak caah a bawmtu hna smugglers pawl nih lam zulhmi pahnih an ngei, “premium” asiloah “economy” tiah theih a si, “premium” in kal a duhmi hna cu, a fawinak bik lam an zulhpi hna i, an kalnak lam zong a ttihnung tuk lo.

Chengen business visa sawknak catlap an pek hna i, vanlawng in Paris ah an kalpi hna, Paris in UK ramah luhpi tthan tawn an si. “economy” in kal aa tiimmi belte hna cu, an kalnak ram phanhnak caah zarh tampi an hngah a hau. “Sihmanhselaw, zeibantuk kalnak lam na thim zongah a donghnak cu aa khat dih, ramri tiangin kalpi na si dih hnuah cun, Lorry trailer in ram chung luhpi na si lai,” tiah Vu nih a chim tthan. Liamcia caan ah khan, mi tampi cu tlaih an rak si cang, bia an hal hnanak in an chimningah cun, micheukhat cu China ram in UK ah an lut, China, France, Russia, Germany, le Poland ram hna cu UK ram luhnak caah an kalnak lam bik a si.

Micheukhat cu, UK ram an phanh hlanah heh tiah rianttuanter an si, cheukhat cu UK ram an phanh hlanah Ukraine le Poland ramah an tlaihmi zong tampi an um.UK ram luhnak caah mi tam deuh kalnak lam i a hmahnung bik ram cu France hi a si, smugglers pawl cu a thlithup in UK ram an luhkhawhnak caah tangka an pek hna i, annih nih an kalpi tawn hna. A caan ahcun mawttaw mawngtu theih loin a thlithup in a kalmi zong an um tawn. Dothlatnak in an hmuhningah cun, mi tampi cu heh tiah rianttuanter an si, nu cheukhat cu pa ihpi dingin chawleh thalnak ah hruai an si, cucaah, an kal duh biknak ram zong phan kho loin a ummi tampi an um cang.Nu caah a ttihnung khun, a thlithup in a kalpitu hna smugglers pawl nih duh poahin an ihpimi tampi an um cang, cucaah, hibantuk ramdang kalnak hi cu a ttihnung bakmi a si caah kal i timh lo a ttha bik tiah an chim. Credit: Laitlang Thlizil

Be the first to comment on "A poi tuk hringhran. Myanmar nupawl singapore le Bangkok an kal duhnak ruang an chimh mi cu fih a nung tuk ko ee"

Leave a comment

Your email address will not be published.


*


error: Content is protected !!