AA pawl nih thawngthannak an tuahmi kong ah Kawl ralkap cozah pawl an thin hun tuk cang

Rakhine hriamtlai Ralkap (AA) cu cozah ralkap nih zahan chun ah helicopters in Rakhine state i Aung Ma Kyaw khuate pawng tlang cung ah a kah hna, tiah khuami nih an chim. Nithumni zingka ah Aung Ma Kyaw khuate pawng i Yaung Yin Tlang cungah an i kah hnu, zahan chun ah cozah ralkap nih helicopters in a kah hna hi si.

“Nithumni in an i kap cang,” tiah Aung Mya Kyaw khuate pawng um Myat Hle khuami U Hla Maung nih a chim. “Tlang cung ah helicopters an zuan lenmi ka hmuh. Buthidaung in helicopters 2 an hung zuang in AA an kah hna. Meithal thawng tampi ka theih, vawlei hlah maw a cim ti awk in,” tiah a chim.

Khuami nih an chimnak ahcun Kan Sauk khuate pawngum Kawl (cozah) ralkap LIB 539 le Artillery Battalion 377 nih Nithumni chun hnu in miakpi in cozah ralkap pawl an bawmh hna. “Kan khua pawngum Kawl Ralkap nih zahan chun hnu in Kawl Ralkap pawl cu an bawmh hna. Tuni cu khuami hohmanh lengah riantuan an chuak ngam lo,” tiah Kan Sauk khuami Phyu Lone nih a chim.

AA thawngthanhnak zung nih, “Nithumni zingka 8am in Aung Ma Kyaw khuate pawng 2km hla ah Kawl Ralkap he kan i kap,” tiah a thanh. Kawl Ralkap biachimtu Win Zaw Oo nih, “AA he kan i kap tak ko nain helicopters kan hman cu dah ngai ka theih lo,” tiah a chim ve. AA nih, “October 11 in 16 tiang kha Buthidaung, Ponnagyun, Kyawktaw, Mrauk-U le Minbya pengah Kawl Ralkap he kan i kap i 40 leng kan thah hna. Kanmah lei cu tlawmte lawng an thi,” ati.

Sinain, Win Zaw Oo nih, “AA nih an chimmi hi an lihmi si, mipi lunglak an duh caah lih an chimmi si,” tiah a al. AA le Kawl Ralkap i kah ruangah Rakhine state chaklei um minung 60,000 leng nih nunnak kawl in inn an zaamtak cang, tiah Rakhine Ethnic Congress (REC) nih a thanh.

Rakhine state cozah nih ‘ralzaam pawl cu dornak ka pek hna lai’ ati nain ṭawncopmi buk ah an um peng rih ko. REC nih, “ral ruangah January in atutiang ah khuami 63 thah an tong cang, 53 hliam an tong rih,” tiah July thla ah a rak thanh. Mah hnu ah a thimi le hliamtuarmi tampi an um rih i atu hi an dihlak zeizat dah an si cang ti hngalh asi rih lo. AA le Kawl Ralkap i kahnak cu ni kum November thla ahkhan Chin state Paletwa pengah aa thok. Mah hnu in Rakhine state chaklei ah an i kap peng. Naite ah cozah he remdaih biaruahnak an tuah len nain anmah 2 kar entainak cu a linsa peng rih ko

Be the first to comment on "AA pawl nih thawngthannak an tuahmi kong ah Kawl ralkap cozah pawl an thin hun tuk cang"

Leave a comment

Your email address will not be published.


*


error: Content is protected !!