Amen, Amen. Muslim khualipi Iran ram ah khrifah an karh chin lengmang cang. Khuaruahar ngai mi thil a tlung thluamah ko

Iran ramah Pathian nih amah zultu hna a karhter chin thluahmah, vawlei fim thiamnak le hremnak nih a kham kho hrimhrim lo. Khrihfami hna an um sianh lonak hmun Iran ramah Pathian sunparnak hmuh khawh thluahmah a si cang. An ram min tiangin an biaknak he pehtlaiin Islamic Republic of Iran tiah an bunh, sihmanhselaw, 1,000 leeng nih Jesuh khrih cu vawlei sualnak vialte kalpitu a si, tiah an vun cohlan tthan cang.

Khrihfami hna um sianh lonak ram a si caah temtuarnak zong tampi an ing, mi tam taktak nih an nunnak caah Iran ram an chuahtak, nichiartein thihphaihnak he caan an hmang, khrihfa zumhnak cu an caah cun temtuarnak phunkhat a si. Cubantuk temtuarnak le thihphaihnak um ko hmanhselaw, Muslim biaknak a zulmi in tam taktak nih an zulhmi biaknak kaltak in Jesuh khrih cu khamhtu a si, tiah an cohlan.

“Nihinni-ah hin thiang thlarau rian ttuannak tampi hmuh thluahmah a si, kum 1994 hrawng-ah khan Iran ramah zumtu 100,000 hrawng lawnglawng kan um, sihmanhselaw, nihinni ahcun 3,000,000 naak tam kan um cang, thiang thlarau nih mipi hna lungthin-ah bia a phuanning cu hmuh khawh thluahmah a si,” tiah khrihfa zumhnak a kalpitu Raizal nih a chim.

Iran ramah hin khrihfa Biakinn tam taktak khar a si, sihmanhselaw, Pathian biaknak belte an kaltak hlei lo, ramleeng-ah a ummi Biakinn pumhnak cu an an umnak hmun in Internet hmang in an telpi tawn hna, mi tam taktak nih an ramchung in United States, Germany, Canada, le Malaysia Biakinn pumhnak cu Skype in an telpi tawn hna, tiah God.tv nih a langhter. “Kan ram nih Biakinn pumh zong a kan sianh lo caah ka Biakinn bik cu ka innchung hi a si ko, Internet in ramdang-ah ka pum tawn, cucaah, Interner Church (internet Biakinn) tiah kawh khawh a si,” tiah Raizal nih thil umtuning a chim.

Vawlei cung ram dihlak-ah Biakinn a karh biknak cu Iran ram hi a si, sihmanhselaw, Middle East ram vialte lakah khrihfa biaknak khamnak hmun bik pakhat a si, cucaah, mi tampi cu an himnak caah Turkey ram-ah an zaam. Turkey ramah a zaammi pakhat nih a chimmi cu, “nihinni ahcun zalong tein ka Pathian ka thangtthat khawh cang, ka refugee hawi tampi he tonnak kan ngeih caan-ah kan chimmi cu, muihnak ram in ceunak hmun-ah a ummi kan si cang timi hi a si,” tiah a chim.

“Ceu nih muihnak hmun a ceuhter bantuk khi a si, kan Pathian kan thangtthat khawh caah lunglomhnak in kan khat, Pathian zong a colcang thluahmah, cucaah, seitan le a ralkap pawl nih kan ram ahcun khrihfami hna zumhnak a tei kho hrimhrim lo,” tiah a chim chap.Temtuarnak le thihphaihnak nih an caan la dih ko hmanhselaw, Jesuh khrih-ah zumhnak an ngeihmi nih lunglomhnak a pek hna, an zumhnak bik cu Jesuh khrih-ah an ap dih, cucaah, lunglom tein Pathian an thangtthat. Vawlei cung khrihfami hna dihlak sinah Iran ram in Jesuh khrih a zulmi hna nih thlacam bawmhnak an hal, cucaah, philh lo tein kan thlacamnak-ah thei peng hna u sih.Credit: Laitlang thlizil

Be the first to comment on "Amen, Amen. Muslim khualipi Iran ram ah khrifah an karh chin lengmang cang. Khuaruahar ngai mi thil a tlung thluamah ko"

Leave a comment

Your email address will not be published.


*


error: Content is protected !!