Buainak longte si cang ko hi. Thantlang ah CND tuahnak kongah buainak tampi a chuak hoi cang

Thantlang Chin Miphun Ni Tuah Nak Hmun Kong Ah: 1. Chinram Cozah hruainak in avoi (72) nak Chin Miphun Ni cu budget tampi dih in Thantlang khua ah tuah ding a si.Thantlang khua ah Chinram huap cozah budget tampi he a voikhat nak Chin Miphun Ni tuah ding a si caah Thantlang khua mi le khuate lei zong rak i ngaih ngai ngai cio a si.

2. Asinain Chin Miphun Ni tuahnak ding hmun cu Thantlang khua lai, mizapi kal khawhnak hmun, kumdang tuah tawnnak Lal Luai certual ah si loin Thantlang khua hlun, kuahel lamchak certual thar ah tuah ding anti tikah mizapi an lung a rawk ngai ngai. Mah certual hi mizapi nih a um zong an thei rih lo i a hmuh zong an hmu rih hna lo ,khual leng ah a si i a kam ah in khat hmanh a um rih lo, lentecelh nak zung nganpi an sak i ai lim deuh rih lo cu lawng cu a um, a kal nak lam a bi i motor pahnih duhpoah kianh nak le saikel he kal nak ah tih a nung, lam thar cawh mi a si, kattaza ai phah lo i a khu ngai ngai ding a si, tar nu tarpa le ngahchia nunau ke in kal khawh nak hmun a si lo, zan puai zoh nak dingah mino caah a tha lo. Thantlang Siang Inn sang caah cun mengkhat hrawng kal hau ding a si.

3.Ziah Khualai Lal Luai certual ah tuah loin khua leng certual ahcun tuah nan timh tiah biahal nak kan tuah tikah cunglei nih khika khin rak tuah u an kan ti an ti. Thantlang mizapi caah tuah timh mi siloin maw cunglei bawi pawl caah dah tuah nan timh tiah i caih sup cio a si, khua leng certual an tuah ahcun mizapi kan kal kho lai lo, bawi le mirum motor nei le saikel nei lawng an kal kho lai. Mizapi kal kho hna seh ti an duh ahcun khua lai cerual ah kan thial piak hna seh, an duh le khua leng certual phuanh puai le biachim nak cu hlunghlai tein khua leng certual ahcun tuah ve ko hna seh tiah zapi au aw a si.

4.Chin Miphun Ni cu mizapi duh nak in a chuah mi a si bantuk in cunglei bawi pakhat hnih duh nak in kan tuah ding asi lo, miphun dang bawi lian duh nak zoh zong in kan tuah ding a si lo. Chin Miphun Ni cu Chin Miphun caah tuah mi a si caah kan catial mi poah ah ” Chin Miphun Ni ” tiah laica in a cungbik ah lianpi in kan tial hnu ah kan miphun hawi a kan hrawmpi mi caah kawlca le mirang ca in kan tial ding a si.

5. Chin Miphun Ni cu miphun tling kan sinak, ram nei kan sinak, ca le holh nei kan sinak, nunphung sang nei kan sinak, miphun thlithuam tling nei kan sinak, kan lungrual nak, miphun hla, miphunlam le miphun paih kan langhter ni mizapi kan i lomh ni a si. Cu caah mizapi hngakchia in tar tiang chun he zan he an kal khawh na hmun ah tuah ah a tha bik, ai dawh bik, airem bik ko. Nawl neitu hna nih mizapi caah ruah than piak khawh ah a tha hnga. Credit: Ex-MP Lal Maung Cung

Be the first to comment on "Buainak longte si cang ko hi. Thantlang ah CND tuahnak kongah buainak tampi a chuak hoi cang"

Leave a comment

Your email address will not be published.


*


error: Content is protected !!