Mah bantuk in a si ah cun Chinram Paletwa cu Rakhine ram a si cang ko lai hi? Chin mipi santlai lo tuk ruangah maw si lai?

Tuzing CCN biaruahnak ah ka chimmi video a sau pah caah atanglei ah Paletwa/Rakhine kong a tawifiannak in ca in ka hun tial than. 1.Kum nga chung AA le Kawlralkap an ikahdohnak ruangah Paletwa le Rakhine ram ummi, sualnak neilo kan Chin mipi (ting 3 hrawng an um) harnak an tonning…. Chinmi 50 leng an kan thah cang. Minung 100 leng an kan hliamh cang. (Nizan ah 7 an thi i 8 hma an pu. Atu zong Palewa khuakam ah an ikap cuahmah)

Chin ralzam(IDPs) 15,000 an phan (Paletwa ah zatceo Rakhine ah zatceo) Minung  tingkhat leng vansang harnak phunphun an tong. Hitining in kan zohsawh ahcun tukum-kumvoi ah a let tam in kan tuar rih lai a fiang. Cu chinchap ah Paletwa kha kan ram tiah Rakhine upa le mipi tampi nih an ti. Rakhine party chairman Dr. Aye Maung zong nih a ti. AA zong nih an statement ah ‘Khumi(Paletwa) cu kan miphun an si’ tiah an chuah. (Official in ca an chuah lo, an chuah lailo, chuahphung zong a si lo, puantang in an kalpimi asi).

Paletwa bawmhnak Chinmi nih kan thawhmi hi USD 1 million (Kawl phaisa in ting thonghra) nawn a si cang. AA le Kawl-ralkap zun-ek le hnawmruhnak ah Chin nih phaisa cuzat cu kan thawh cang. Zeizat dah kan thawh rih lai? Hi buainak um hlah sehlaw hi phaisa hin Chin mino minung 30 leng ramdang ah sianginn kan kaiter khawh hna hnga. Asiloah, CNF caah meithal 200 leng a cawk khawh hnga.

AA le Kawl ralkap hi an pa hnih in kan miphun harnak a kan petu, a kan nehsawhtu an si. Kan miphun cungah ralhrang(terrorist) bantuk an si cang. Kawl ralkap cu kum 50 renglo kan tonmi si i kan ifiang ko. AA(Rakhine ralkap) nih hitluk in an kan zomhtaih le a kan suaksamning hi cu lung a fak khun.

Ziah hi thil hi kan ton? Kan miphun thazang kan ser khawh lo caah an kan nehsawhmi si ko (cu e, kha e, chim awk um lo). Miphun hriamtlai 2000 in 5000 kar nei ve kho usih, miphun party ah ifun din kho usih, miphun zatlang(CSO) buu tthawng ve usih, atu bantuk in an kan nehsawh ngam naisai lai lo afiang tuk. Chin miphun hi Kayah, Wah, Pa-O le Palaung tepawl nakin a let hnih tluk dengin milu kan chah deuh nain miphun tthawnnak thazang ahcun a let 5/10 in an kan thlau. Zeiruangah? Annih cu miphun ah an ifun, hram an bunh i thazang an ser.

Cucaah miphun ifun caan, thazang iser caan a si cang. Mipi zong nih miphun in dirhmi buu– hriamtlai, party le zatlang (CSO) pawl kha dirkamh can si cang. Miphundang bawmh/chawmh can a si ti lo. Miphun dang nihcun zeimawzat lawng an kan bawmh lai nain kan sahngar-ar taktak cu kanmah tein kan iven a haumi si. No if, no but. CNF/CNLD/CHRO etc an tthawn lawngah, an hruaitu cuti si caah, tiin, cutinkhatin “…lawngah” timi silhnalhnak um ti hlah seh. I funtom cang hna usih!

Cucaah  CNF thawnter usih. A tthawng chin lengmang fawn ko. Lamdang dap hlah usih. Miphun ser hi zingzan ah a phichuak bawh colh dingmi thil si lo. CNF hi a ruah hlan ah 2000 in 5000 karlak a si ahcun (asi kho ko) zeihmanh phan ding um lo. AA hi Paletwa ahhin thongkhat kuakap lawng dawh an um ko cuh. Kawl ralkap zong cu hrawng lawng. (Online ah mino pawl CNF uhttanhnak nan chimrelmi ka rel. Khatlei ah nan lungfah caah asi, atha ko. Nain lungdongh lei in biasai phai ruam hlah uh. Dengmangte dawh si hih. Nan thazang tu chuah cio uh).

Miphun party, mipibuu (CSO) zong thazang ser usih. Cucu dirkamhtu ding hauhruang an si. Rakhine party an tthawnnak nih AA thawnnak a bawmhtuk ti philh hlah usih. Miphun dawtnak le ralthatnak cu miphun ramkhelbuu dihlak nih tii le non toih ciomi theipar an si. Kawl party nih tii toihmi kung in cu thei cu a tlai lailo.

Paletwa he pehtlaihnak motor lam pemh dih ding. Matupi-Paletwa, Lailenpi-Paletwa, Kanpetlet-Sami-Paletwa pemh dih ding. Paletwa-Zorampui(Mizoram) zong a rannak in pemh ding. Cucu cozah nih nihin tiang tthatthi in a pemh khawh rihlo caah lungrawk a si. Nawr ahau. Har tuar pawl bawmhnak zong cu thachia lo tein tho cio ko rih hna usih. Cun Rakhine ram ummi Chinmi pawl zong bawm hna usih. Hihi miphun kan i suathlam a si. A cat cangmi miphun laihri a kan peh than tu a si. An kan uhttanh ngai hih. Bawipa nih kan Chinram kan kilvenpi ko seh!-Salai Ceu Bik Thawng: Paletwa/Rakhine/AA/Kawl-ralkap kong

Be the first to comment on "Mah bantuk in a si ah cun Chinram Paletwa cu Rakhine ram a si cang ko lai hi? Chin mipi santlai lo tuk ruangah maw si lai?"

Leave a comment

Your email address will not be published.


*


error: Content is protected !!