Coronavirus kong a rak chim hmasak bik Dr. Li Wenliang cungah palik thil tuah ning China cozah nih a phuan; Ramkip hruaitu pawl lung a dam kho bak lo

USA President Donald Trump nih twitter ah Coronavirus hi Chinavirus tiah a rak ttial mi hi a hman bak ko hi. Coronavirus kong a rak chim hmasa bik mi Dr. Li Wenliang (Whistle-blower) kong cu China cozah nih a phuan cang. Mipi an lung a dam kho bak lo. Lung damter i timh zong ah a fak chin lengmang ko. Mah bantuk in mipi nih an tuar ding mi a duh lo tu cungah China cozah thil tuah mi cu thin a hun thluamah ko. Coronavirus, World Health Organization (WHO) nih “COVID-19” tiah an ti mi nih vawleicung ramkip cu harnak le thinphan thlalou in a kan chia cang i, ram 148 ah mah zawtnak hi a phan cang i, atu hi minung 10028 nih an thi pi cang. Mah zawtnak angeih mi hna hi minung 245000 an phan cang. Mah zawtnak in a dam mi tampi zong um hna hman sehlaw, mah zawtnak ruangah a thi ding mi an tam chin lengmang tiah Scientist pawl nih fiangtein an chim

China cozah nawlngeitu Communist Party Central Committee ngan nih cun COVID-19 zawtnak hi a karh lai caah vawleicung hmun kip nih a tuar lai tiah a rak phuan hmasabik tu le mipi sin ah ralrin nak a rak chim hmasa bik tu (Whistle Blower) an ti mi pa Dr. Li Wenliang (34) thinak ruang le Wuhan khualipi ah mah bantuk in zawtnak a karh ning hlethlainak an tuah hnuah thil hman mi, an hmuh mi an chim mi cu, thil hmanlo mi (inappropriate) an rak um ruangah a si tiah zahan ah thawngthanhnak an tuah

December 2019 hram thawk ah Dr. Li Wenliang nih SARS zawtnak bantuk, fawtein mi a that khawh mi cu China ram ah a um tiah Socia Media nih a phuan. China mipi hna cu ralrin tein um ding in a forhfial hna, mah bantuk in mipi sin ah theihterhnak atuah caah Chinese palik pawl nih, bia hman a chim lo mi, Cozah phunglam a doh tu na si an rak ti i, fakpi in hremnak (Repremanded) an tuah. Chinese palik nih bia dik le hman cu mipi sin ah theihter lo in thuh an rak tim mi ruangah atu hi ramkip nih harnak a tawn thluamah cang. A rak thawk cangka tein China cozah nih thatein thawngthannak rak tuah cang seh law mah bantuk dirhmun hi kan phan lai lo.

Dr. Li Wenliang thihnak kong Feb thlaah vawleicungpi nih a theih bak in, mipi cu China cozah cungah an thin hun tuk cang i, fakpi in soisel le thangchiat a si. Chinese mipi nih zalawngtein bia chim khawhnak (Freedom of Expression) an ngeih lo ning le Coronavirus kong an rak theih ko bu in thatein an rak doh lo mi le atu bantuk in vawleicung kip ah harnak kan tawn hnga lo ding. Hubei Province in December-January thla chungah vawleicung ramkip ah Chinese mi hna cu an duh poah in khua an rak tlawng i, Chinese mipi ramkip ah khua an tlawng khawh caah Europe Asia ram ah mah zawtnak hi mi tampi sin ah an chonh thluamah hna ruang ah atu dirhmun hi kan phan mi a si

China ram TV Tading lar tuk mi, Cozah ta CCTV nih cun, Central Investigation nih Dr. Li Wenliang thinak kongah Wuhan Palik pawl thil tuah ning cu a dik lo tuk mi thil a si. an thil tuah mi hi pawm har ngai mi a si tiah a chim. Mah lawng si loin Investigators pawl nih cun Dr. Li WenLiang an zohkhennak hmun hma kongah thil dik lo mi a um i, Kum 34 lawng si i, amah hi mino te a si fawn. Covid zawtnak ruangah a thi mi tampi hi kum 60-70-80 bantuk lawngte an si ttung. Mah bantuk in mino tenih mah zawtnak a thi pimi hi lunghrin nak tampi a ngei tiin an chim. Investigators pawl sin ah Dr. Li Wenliang rian ttuanti hoi le nih an chim ning ah cun, Dr. Li Wenliang nunnak khamhnak ding caah fakpi in rian an rak ttuan, natein an ruahnak leng lei in (unwilling to give up) thil zeimawh hi a rak um tiah an chim. Wuhan khuachungah nawlngeitu (Local Authorities) pawl nih palik nih Dr. Li Wenliang cungah thil dik lo tuk mi an tuah mi cu tuah lo (Revoke) ding in an nawl hna.

Mah bantuk thil hna cu palik nih Dr. Li Wenliang cungah an tuah caah, Thil diklo (Wrong) an tuah mi kong ah le a chungkhar sin ah thil diklo an rak tuah ruangah ngaithiamhalnak (Apologize) an rak tuah. Mah bantuk in thil diklo Dr. Li Wenliang cungah an rak tuah ruangah Dy Director of Rhongnan Road Polic Station cu, Admistrative Depaartment lei in officer duty pawl hna cu fakpi in an ram chim hrim hna. Dr. Wenliang a thi cang tiah cozah tading nih thawngthannak a rak tuah hnuah le The Wuhan Central Hospital an rak phuan hnuah, atu hi zohkhenhnak tangah a um lio a si tiah an ti than (He was undergoing emergency treatment). Vawleicungpi nih Dr. Li Wenliang cu mi raltha Sibawi, Bia hman chimtu, (Hero Doctor who tell the truth) tiin a theih peng cang lai. Amah Dr. Li Wenliang hi Ophthalmologis a si i. Oct 12, 1986 ah a chuak. Feb 7.2020 ah Covid-19 zawtnak ruangah anupi fa a poi lio mi cu a thitak .

Dr. Le Wenliang nih December hramthawk hrawngah kum 2002 bantuk in zawtnak ttih nung tuk mi a chuah lai tiah a rak chim mi cu Chinese official pawl nih bia (Supress) loin rak um seh law, atu bantuk in vawlei cung ramkip ah ttihnak le harnak vialte kan tawn hnga lo ding. Dr. Wenliang a rak chim ning bantuk in China cozah nih mah zawtnak hi rak zohkhen cang hna seh, atu bantuk in thil a cang lo ding tiin China tading Business News Website nih a ttial

Wuhan khualipi ah Coronavirus a rak thawk lio te ah khan, US center for desease Control and Prevention rian ttuantu pawl nih January 8 ah khan China an va tlawng i, natein Chinese official pawl nih thatein an rak chim duh hna lo i, natein mah zawtnak hi thup khawh a si ti lo caah January 20 in Wuhan khualipi, minung 11 million umnak cu Lockdown rak tuah a si. Natein lockdown an rak tuah hlan ah Wuhan khualipi ah um mi mi tampi cu vawlei hmunkip ah khual tlawn in an rak kal cang caah atu dirhmun hi kan phan mi a si.

Be the first to comment on "Coronavirus kong a rak chim hmasak bik Dr. Li Wenliang cungah palik thil tuah ning China cozah nih a phuan; Ramkip hruaitu pawl lung a dam kho bak lo"

Leave a comment

Your email address will not be published.


*


error: Content is protected !!