Cristiano Ronaldo fans te mittui ti tla tu le Ronaldo tan muthil theih lona tur tunlai thil thleng

Lionel Messi hnenah khawvel footballer ṭha ber chawimawina Ballon d’Or chu a vawi ruk nan hlan a ni a, chumiin a sawi tel chu a elpui ber Cristiano Ronaldo chungah a awm ta tih hi a ni.  Ronaldo fan-te tan thu hriat nuam a ni lo a, Portuguese forward tan pawh a nuam lo a ni ang – Serie A Player of the Year chawimawina semna lamah a kal daih a, Messi Ballon d’Or dawng lai hmuh a duh lo.

Juventus forward hi Thawhṭanni hma zawng kha chuan Messi nen an intluk a, Ballon d’Or panga ve ve an nei. Tunah erawh pakhatin Messi a chungnung ta zawk a, kum upa zawk Ronaldo hian a lehpel leh thei ang em? tih chu zawhna ngaihtuah ti thui tak a ni mek.  Messi lahin hriatthiam theih tur takin ṭawngkam a nei zui a, Barcelona forward chuan, “Cristiano-a’n ka Ballon d’Or neih ang zat a rawn neih kha chuan a chung berah keimah chauha ka awm tak loh avangin hrehawm ka ti a, mahse khatihlai khan kei aia dawn a phu miau si a ni,” a ti – tunah Ronaldo chungah a awm leh ta.

Ballon d’Or thawnthu

Kum 2008 khan khawvelin player danglam bik Manchester United-ah a hmu a, a hming chu Cristiano Ronaldo a ni. Portuguese tlangval inringtawk tak hian he season-ah hian match 49-ah goal 42 a khung tehreng a nih kha! Footballer ṭha ber hnena pek ṭhin Ballon d’Or chawimawina pek a ni a, khawvelin thil ropui inṭanna a hmu. Barcelona-a rawlthar ṭhangduang Messi a awm mai mai bik lo a, 2008-09 season-ah treble champion an ni a, Ballon d’Or a dawng ve leh ta thung.

Ronaldo-a’n Real Madrid a pan zui a, hna ropui tak thawk zui reng mah se Messi a awm ve tak avangin a beisei angin thil a kal zui lo. Kum 2010, 2011 leh 2012-ah te Messi-a’n Ballon d’Or a dawng zui a, Ronaldo-a’n Messi chawimawina dawng lai hnai takah a en ṭhin.  Mahse, Ronaldo hun a inher chhuak a, 2013 & 2014-ah a rawn dawng a, 2015-ah Messi rawn lang ve leh zawk mah se 2016 & 17-ah dawng zui lehin Messi a nihrual – nikumah Luka Modric a rawn lang ve zawk a, kuminah Messi kutah hlan a ni leh ta.

Messi aiah VVD?

Ronaldo lehpelin Messi-a’n Ballon d’Or chawimawina a dawng a, kumina a khum tak Virgil van Dijk nen an inhnaih hle – Messi hian vote tla  aṭangin 24.4% a hmu a, VVD hian 24.1% a hmu thung. Ballon d’Or-a pakhatna leh pahnihna an inhnaih ber ṭum a ni! Hetiang boruak karah hian fans tam tak – a bik takin Liverpool fan-ten VVD-a’n chawimawina dawn a phu zawkah an ngai a, a ngaihdan sawilang zingah Reds manager Jurgen Klopp a tel.

Khawvela team hmuhnawm ber pawla Liverpool chhuahtu coach chuan, “Journalists ho ngaihdan anga thlan a ni mai a, ka hmuh dan a danglam thung. Lionel Messi hi ka hmuh tawhah chuan khawvela footballer ṭha ber a nih thu hi vawi tam ka sawi tawh.  “Mahse, season hmasa kha Virg hian a hmang ṭha em em a, defender-in kha aia season an hman ṭhat kha ka la hre ngai lo. Ngaihdan dik tak sawi ta ila, Ballon d’Or  hi VVD hnenah hlan se a awm zawkin ka hria,” a ti.

Insum harsat CR7 chhungkua

Ballon d’Or semnaah Ronaldo a tel lo a, hemi chungchangah hian VVD chu, “Khingpui i nei tlem sawt ta,” tiin media lamin an kawmnaah an hrilh a, “Ronaldo hi ka elpui a ni em ni?” tiin fiamthuin a chhang.  VVD hian a hnuah Messi leh Ronaldo a ngaihsan thu sawi mah se fans tam takin Dutch defender fiamthu an nuihpui thei lo a, insum har ti fal zingah Ronaldo farnu leh English journalist lar Piers Morgan te an tel.

Ronaldo unaunu Katia Aveiro chuan instagram lamah thuziak thui tak hmangin a nuṭa thlavang a hauh a, VVD a ṭim! Liverpool defender hi a unaupa sulhnu ang nei ve phawt turin a chah a, Cristiano chu a ban phak loa awm a nih thu a hrilh!

Piers Morgan pawhin, “Cristiano hi i chung daiha awm a ni,” tiin VVD a hrilh a, Dutch defender chuan, “Piers, social media mai mai aṭanga ngaihdan siam lo a, interview pumpui i en chuan ka fiamthu a ni tih i hrethiam ang a, Messi leh Ronaldo ka dahsanzia pawh i hrethiam mai ang,” tiin a chhanglet! Souce- Vanlaini

Be the first to comment on "Cristiano Ronaldo fans te mittui ti tla tu le Ronaldo tan muthil theih lona tur tunlai thil thleng"

Leave a comment

Your email address will not be published.


*


error: Content is protected !!