Human Right Watch (New York) nih kawl ram cu ceilak in a mual a photer cang

Myanmar ralkap tuahsernak kongah ICOE nih dothlatnak an ngeihmi in biachahnak an langhter cang, bia-alnak zong a chuahpi colh. Myanmar cozah nih Rakhine ram kong dothlatnak ngei dingin ramdangmi a thimmi hna nih an hmuhmi kong biaphuannak an vun langhter cang, Rakhine State ah Myanmar ram nih nuhrin covo buarnak a ngei maw tiah an dothlat, raltuknak puarhrang bakmi cu a rak um hrimhrim ko, sihmanhselaw, miphun thah dih timhnak (genocidal) balte a um loh tiah an langhter.

Dothlatnak a kalpimi hna nih hin President riantlai Win Myint sinah December 20-ah khan an hmuhmi kong thongthanhnak an ngei. “Rakhine State le hmundangah hmuh khawhmi le theih khawhmi in dothlatnak kalpi a si, puar hrang taktakin nuhrin covo buarnak caah raltuknak, phunglam nih a cohlan loning in innchung thil hrawh piaknak cu raltuknak a um caan 23 August in 5 December, 2017-ah khan a um hrimhrim ko,” tial dothlatnak a ngeitu panel pawl nih press statement-ah an langhter.

Raltuknak zong kha Arakan Rohingya Salvation Army (ARSA) pawl nih August 25, 2017 i Palik Outpost an tuk ruangah aa thawkmi a si tiah an langhter. “Kan hmuhmi dihlak in theih khawhmi cu, miphun thah dihnak caah zeibantuk tuahsernak hmanh a um loh timi hi a si,” tiah thilsining a fiannak caah an langhter chap.

The Union Enterprise for Humanitarian Assistance, Resettlement and Development in Rakhine (UEHRD) ah Advisory riantlai Toe Oung zong nih, “Report in an hmuhmi kong an langhtermi hi a dik bakmi a si,” tiah dothlattu pawl a dirkamhnak kong a chim. Arakan National Party ah Secretary rian a tlaitu Khine Pyi Soe zong nih a chimmi cu, “Ralkap nih nuhrin covo an buar hrimhrim ko timi cu report tuahnak in langhter le hmuh a si cang, cucaah, ralkap hruaitu hna nih nuhrin covo buarnak he raltuknak a kalpitu an ralkap pawl cu dantatnak an pek hrimhrim awk a si,” tiah a chim.

New York-ah aa bunhmi Human Right Watch bu pakhat Deputy Director a simi Phil Robertson balte nih, “International Court of Justice (ICJ) ah Myanmar kong hi ceih a si cang, biachahnak an tuahmi hi ICJ in sual phawt an si lonak hnga bawmtu pakhat menmen a si lai, dothlatnak in an hmuhmi vialte cu English le Burmese in vawleipi theih-ah an phuan awk a si, bia dik kan thei duh, zeitindah hlathlainak an kalpining a si timi hngalhnak caah an langhter awk hrimhrim a si,” tiah a chim.

“Myanmar ralkap kongah dothlatnak a ngeitu Independent Commission of Enquiry (ICOE) nih an hmuhmi kong an langhtermi cu kan ruah loning in a si, Commissioner pawl hi Myanmar ram he naihniam tein a ummi hna an si caah dik tein an kalpi taktak maw timi cu an langhter a herh,” tiah a chim chap.

Dothlattu pawl nih hin thilsining theihnak caah Rakhine, Yangon le Nay Pyi Taw ah an kal, minung 1,500 hrawng biahalnak an ngeih hna, bia an halmi hna lakah a tam deuh cu Rakhine State i a ummi Muslims, Rakhine, Mro le Dainget miphun pawl an si, ralkap le palik zong tam taktak biahalnak an ngeih hna. “Khuachungmi in sualnak zong a tuah lomi tampi cu hramhram in tuk le velh an si, ralkap nih an nuhrin covo an buar piak hna, phunglam loning in tuahsernak tampi an ngei,” tiah an report-ah hin langhter a si.

Report an ttialmi ahcun cahmai 461 le annexes 31 a um. Dothlatnak a ngeimi hna lakah hin Japanese diplomat Kenzo Oshima, Myanmar Constitutional Tribunal-ah Chair a rak tlai tawntu Mya Thein le UNICEF nawlngeitu pakhat a rak si tawnmi Aung Tun Thet zong an i tel tiah langhter a si. Credit: Laitlang Thlizil

Be the first to comment on "Human Right Watch (New York) nih kawl ram cu ceilak in a mual a photer cang"

Leave a comment

Your email address will not be published.


*


error: Content is protected !!