Myanmar Ram Ah Amah Pasal Bak A Si Mi Cu Midang Pahnih I Sawm In Zan Ah A Thah Ter Hna

Karen ramkulh Myawady myone Metta Lin Myaing khua ah nutung pakhat nih cun, a pasal a si mi bak cu, midang minung pahnih ai sawm hna i zan ah a thli tein a thah ter hna. November 29 i thilcang mi a si i, December 8 lawngah biahman le thawngpang cu theih chuah a si.

Myo Aye cu November 29 zingah an inn kutka hram bak ah nam i tuk nak hliamhma he a thi cia in a ruak in an hmuh i, palik sin ah theihter colh a si hnu ah, palik pawl an rak phan colh ve. Palik pawl nih cun a nupi Zani cu bia an van hal tik ah Daw Zani nih cun “Kei cu inn hnulei ah ka it i, ka pasal cu inn hmailei ah a it. Zing ka van thawh tik ah cun ka pasal cu nam tuk nak hliamhma he a thi cia in ka char mi a si tiah a ti.

Palik pawl nih cun Myo Aye thattu si ding i an zumh mi cu theitawk chuah in an kawl cuahmah, an dothlat lengmang nain, a nupi Daw Zani ti dah lo cu lunghrinh mi an nei loh i, December 8 ahcun hrocer chih buin bia an hal than ti a si. Cutikah cun a tih tuk cang hna i, Daw Zani zong cu thil sual a tuah mi vialte kong ah cun ai phuang dih i minung pahnih ai sawm hna i a pasal an thah nak kong cu a chim dih ve.

Cu bantuk a tuah nak a ruang ah Daw Zani nih cun ” Ka pasal cu a thinlung a chia tuk i, khawika hmun zong ah kalter a ka siang loh, thawngtla mi ka lo cang i a ka vuak lengmang ruang ah ka tuar kho ti loh i hi bantuk thil ka tuah mi hi a si tiah a ti.

Daw Zani nih biahman ai phuan hnu cun a sawm mi minung pahnih zong an va tleih colh hna i, Myawady i a um mi Wai Naing Phyo ( kum 20 ) le Moe Min Thant ( kum 33 ) an si. An pathum in palik pawl nih cun thawnginn ah an khumh hna i lainawng case an siam piak hna.( News Journal )

Credit : Vapual Auaw

Be the first to comment on "Myanmar Ram Ah Amah Pasal Bak A Si Mi Cu Midang Pahnih I Sawm In Zan Ah A Thah Ter Hna"

Leave a comment

Your email address will not be published.


*