Nihin, Hakha ah Min Aung Hlaing le a uico pawl thil tuah ning cu celh ding bak si lo

Hakha ah Ralkap nih Anmahte in Vote Relnak an Tuah Than. Hakha ah ralkap (SAC) nih peng/myone pali i vote pawl zohfelnak anmahte in an tuah tthan, tiah thawng kan theih.

Atutan hi ralkap nih November 2020 thimnak i Chin ramkulh chung vote pawl zohfel tthannak a voi 2nk an tuah a si.

Hakha, Thantlang, Falam, Tedim le Tonzaang vote pawl zohfelnak an tuah, tiah NLD chan Chin ramkulh Election Commission Chairman Pu Uk Nawl nih a chim. “April 9 ah Hakha le Thantlang vote an zohfel.

Cun April 10 ah Falam, Tedim le Tonzaang i vote pawl zohfelnak an ngei. Mah dih hin Thlanglei Laitlang i vote pawl an check tthan lai,” tiah The Chin Journal ah a chim.

Ralkap nih uknak an chuh hnu in vote rel tthannak voi khat an rak tuah cang. Cu lio ah cun Chinram Election Commission chungtel upa tampi ralkap nih Rungtlang ah an chiah hna i, Chinram chung ohsuh 4 i vote an rak zohfel hna.

Asinain, ohsuh 4 i vote an zohfelmi a phichuak langhter a um hlan ah cunglei nih vote relnak rak ngol u an ti hna caah an ngol i Rungtlang ah an hrenmi upate zong an thlah tthan hna.

Atutan Chinram chung vote rel tthannak a voi 2nk ah NLD chan i Chinram Election Commission chungtel upa pawl an au ti hna lo. Myanmar ralkap nih rian an khinhmi hna vote reltu pawl lawng nih an tawlrel cang.

Chinram ah cun Dr. Ba Maung nih a hruai hna i Uknak lei zung, Palik zung le La Wa Ka zung tibantuk in rianttuantu pawl nih vote zohfel tthannak an ngei. Pu Uk Nawl nih, “Atutan vote rel tthannak kong ah keimah nih ka theihmi zeihmanh a um lo caah minthutnak zong ka tuah lo,” tiah a chim. The Chin Journal

Be the first to comment on "Nihin, Hakha ah Min Aung Hlaing le a uico pawl thil tuah ning cu celh ding bak si lo"

Leave a comment

Your email address will not be published.


*