Ningcang Loin Luban Nih Thil An Tuahmi Ruangah CCF Malaysia Khrihfabu Cu I Țhencheu Dih Dawh An Si

 Chin Christian Fellowship (CCF) cu, Malaysia ramchung ah Milu tambik an umnak Khrihfa bu a si. 2018 August thlahramthok ah an Chiarman nih Kawlram lei ah a thlithupin a rak zaam tak hna i, Khrihfabu phaisa zong tam lakte a rak i tlikpi caah Lei killi a rak hninh bal kha kan theih cio kola dah. Mah vialte Malaysia phaisa Rm 68000 le $550 kha kawlram phaisa in 25,623,000 ( ting zahnih le a cheu leng) a si. Hi phaisa hi Malaysia CCF members vialte nih Malaysia minung hna kuttang ah thadi zaangba in an tuanmi chung in an hmuh mi cheuhra cheukhat le thawhlawm/ damlo caan ah i zohkhenhnak tiin pehtlaihnak an pekmi chung phaisa an si caah thil hmete a si hrimhrim loh nain nihin ni tiangah cawiliam ternak thawngpang ngaingai theih ding a um hraw loh. Mah tikhan thil a can hnu cu an lung a fim cio la i, CCF a ngan a dam cang ruala tiah zawndamh a si. Nain, nihin ni ah an lutlai cheukhat le a bikin ram pumpi Chiarman nih Bylaw kalhin ningcang loin khuakhan lairelnak a um lengluang caah zeidah a cang tthan hoi timi a tawinak tein a tanglei ah kan zohtti hna la. CCF kongkau theih hmaisa lo cun a tanglei bia hna hi i fian a har lai caah an dirhmun a tawinak tein vun tenh ta duak sih. Chin Christian Fellowship (CCF) Malaysia cu hmun khat te i thawhlawm le cheuhra cheukhat ai hrawm mi hi hmun 6 an si i, milu 2000 helham an si. Pastor minung 4 an ngeih hna. Cun, a tengnge/ a cheubangin ai pehtlaihmi hi hmun 7 an si, thihloh kongah ai hrawm mi hi ZACF an si i an dih lak cun hmun 14 an si. Hmun 14 fonh an member hi 6000 hrawng an si. An i hruaining ah Chairman le Upa ca Thimnak hi kumkhat voi khat lengmang in tuah a si. Zunglei Centre rian tuantu hna cu Peng tlang chung in minung pa 3 cio thim i tuan ter an si. Mah chung cun OB Te thim an si. Thlakhat voi khat EC meeting ngeih peng asi. Pulpit committee an ngei. Center Committe nawl ngeihnak tangah sangkip chiarman vialte hna cu an um. Phunghram (bylaw) tlamtling tein ngeih dih a si i, phunghram tangah O.C te nih herhhai hna cu ceihkhan le hmalak asi. 1st: Senoir Pastor Sinak An I Cuh Kawlram ah Senior Pastor caah tiah E.C lungtlinnak in an cahmi Rev. Jeremiah Sang Dun, nih Senior a sinak dirhmun cuh an duh caah an soisel mi le an lutlai minung pa hnih khat nih a thlithup in (senior ah ai tlak lo tuk tibantuk) an rem lonak bialutchuak ai theih caah ruah lo pi ah a lungfah lungin a tluntak hna. A umkalnak ca phaisa zong lutlai nih an rawnh duh loh i, a hnu ah a neihniam hna nih an theih caah 2020 kum hramthok E.C meeting ah 2019 an Chiarman Pu. Tei Kil le mipi kar ah a phunphun in biafak i elnak a chuak. Rev. Jeremiah Sang Dun hi Senior Pastor caah an cahmi a si nain mipi nih theih phak lomi thil le chiarman pi chanbaunak ruangah Malaysia ah phung ningin tthutdir khawhnak Passport zong Kum 1 lengkaipi ah an tuahpiak kho loh tiah theih a si. 2020 kum hramthok i Kawlram ah ruah lo piin a tluntak hna tiang zongah Passport cu an tlamtlinh thai loh. A mah hnu ah an cah tthanmi Rev.Dr. Van Tha Lian tu cu luklak loah Passport an tuahpiak khawh fawn caah Senior pastor caah Chiarman Pu. Tei Kil nih duh deuhmi midang a neih caah a si hnga ma tizong a ruat tawk an tam.
2nd: Phungkalh In CCF Ram Pumpi Chaiman Le O.C Upa Thimnak Lakhruak In An Tuahpi Hna CCF Khrihfabu ah Full in ai pehmi sang hna cu Pudu, Seremban, Klang, Damai, Cheras le Puchong tiin hmun 6 an si hna. Full in ai pehtlaimi hna hi members 2000 hrawng an si hna. Sangkip nih mah sang hruaitu Khrihfa Upa i ngeih cio a si i, mah pawl hna cu Center Committee timi cunglei kuttang ah an cawlcang hna. Mah hi zat members hruaitu caah O.C upa thimnak hi kum dang tawn bantuk siloin 2020 cu CCF hmun 5 vote tel loin, CCF Pudu lawng an i pumhnak ah lakhruak (Emergency) in mipi ai pum mi hna he O.C upa thimnak le vote thlaknak an tuahpi hna. Mah hi bantuk thimnak hi Lutlai minung pahnih khat men nih phunghram an merh i an ttawncop mi a si lawng siloin, Catlap kutpi tia in tampi an thlehmi kha emergency in ai pummi mipi an phawt hna i, Chiarman caah nan duhmi Pa a min tial uh ti men in an tuah tir hna. Ai pummi milu nakin Vote a tam deuh ngai caah minung kan rel uh tiah anti hna nain an cukha hna loh. A um tuning cu, minung 1 kha catlap lawngmi pa 1 lawng phawt ding ansi nain pa 4 hna in an phawtmi hna an um caah micheu khat cu minung 1 nih vote 4 hna in an rak thlakzuar tinak a si. A tanglei h ka taar bantukin minung pa hnih nih an Fb ah a postmi cu hitin a si. “Minung thong 2 reng lo umnak Khrihfabu / Fellowship pical emergency in OC thimnak tuah le bu khat lawng nih thim timi hi ka voikhat theihnak a si. A donghnak tal si hram seh. A mak tuk lawlaw khi si..” “Mah nih luban tlaih duh ah Khrihfabu le Khua thimnak te hna hi cu a thlithup le ningcanglo tinhmi ngei incun tuahrai a silo. Khrihfabu le Khua damlo hramthoknak asi. Khrihfabu ah a Khua le Pengtlang in ttan- Khua ah mah chungkhat le biadiklo in mi va mawn hnu i luban a tling chommi hi cu Pathian nih a rian caah thimmi ah kan in chia kho hna lo. Inautat ding lehlam khi si. Zawtnak tluntertu nan si caah hi ral hi cu doh a hau.” CCF members 600 hrawng an um hnanak sang khat caah Khrihfa Upa thimnak hmanh ah Catlap cungah Nomination minung 16 taar i mipi kha Catlap cu an phawt hna i, mipi nih an duhmi hna minung 8 kha Zah i vote thlaknak ngeih a si. An vote kha sangchung ah rel siloin Pastor te nih Center ah an i kalpi i, Center nih vote relnak an va ngeih hnu ah nannih sang nan Vote result mah tin a si tiah thawng an hei thanh chin tawn hna. Tukum 2020 balte mipi nih an thlakmi Vote result cu cunglei ah phakpi si tiloin ai pummi hmai ah Vote result an hmuh zat cu rel i, mihlun zong an tlak le tlak bak tiin tuah a si. Kumdang bantukin cunglei Center ah Vote kuat an duh tilonak a ruang cu Center lutlai hna nih mipi nih an thlakmi vote ningin siloin anmah nih a rem anti ning paoh in Vote result thanh an hman caah a si. E.C meeting tuah caan ah Center Committee pawl an sining (ruh lang bakin) tein a ti ngamtu hna poah cu a kum voi Khrihfa Upa thimnak Result Center sin a phanh bakin kumthar ca Khrihfa Upa sinakin mipi Vote ah an tlin ko zongah Lutlai minung pa hnihkhat nih vote an merh i an thlak colh tawn hna caah a si. Lutlai minung pahnih khat nih thil an merhmi a um len tawn caah 2020 ca Ngunkeng tu caah an thimmi nih Ngunkeng ttuantu sinak cu a cohlang kho hna lo i, nawlnolhin le hnekchomin midang thimnak zong an ngei . Hnekchom rianttuan kanti cu ngunkeng ca zongah phur a rit ngai te khomi a si.
Biatlang Kawmnak Tutan ah CCF Malaysia kong har lengmangin sangkip hruaitu upa hna sin ah kan khawmhsuat i, kan rak thlahmi hi a hau hlei kan huat hna ruangah siloin CCF rampi a dam deuhnak a si hngama timi ruahchannak he kan rak thawlhmi a si i, kan tial palh deuhnak zawn zong a um kho men ko. CCF rampi a dam khawhnak ding caah cun Phaisa mit a au lomi pumpeknak a ngeimi hruaitu kan herh. Tuzarh 25 January 2020 ahhin Kum 2020 CCF General Meeting cu tuah an i tim. Agenda hi E.C nih a ceih cangmi an si hna i General ah cun fehternak lawng tuah duahmah ding khi an si te la i, (1) Pastor thar lak tilo ding. [Pastor hi kan i za bak loh, nain a thar an lak sicun an lakmi kha Senoir a si lai phan ah !!] (2) 2020 ca CCF chiarman pi Pu. Tei Kil cu a thlahlawh kan keih kho la maw? [E.C sin ah an chuahpi cang nain E.C nih tling deuhin bia hrennak a tuah ngam loh] (3) Phaisa Controller caah Chiarman pi siseh law nan lung a tling cio la maw? (4) O.C upa nih CCF phunghram hna cu a herh ningin remhnak nawl pek si hna seh. [Agenda, dang a um len rih] Mah a cunglei pawl hi ceih a si tela i, Agenda chapnak ah “Chiarman pi thimnak a tharin kan tuahpi uh” anti te sual sicun, culo zeidang Agenda zong mipi an lung a tlin te lo sicun sangkip nih CCF Center ah i pehtlai tiloin Local in dir an duh cionak kong nih Meeting a buai ter sual lai phan a um ko. Meeting hruai hmanh a thiam lo i, Pastor te peng Meeting a hruaitir tawntu Lutlai nih Chiarman a ttuan sing zong cu zapi nih lungtlin awk ah a har ngai hrim kola. A fanu pasal a ngeih lio ah a biaka a long tuk sual i, a khuami pawl Rawl eiloin an a tam deuh cu an lawi anti mi hna kha si dawh ngai a si ko rua. Ka tialmi a tam ngaingai cang caah mah vialhin ka ngol rih la. A herh sicun, CCF Churchschool saya/mah te an lung a fahter hnanak kong le milai Pastor pi nih kut dongin Meeting ah an sawh chih hnanak kong tibantuk zeidangdang cu tial khawh tthan kan i zuam tela. Catialtu: John le a hawile

Be the first to comment on "Ningcang Loin Luban Nih Thil An Tuahmi Ruangah CCF Malaysia Khrihfabu Cu I Țhencheu Dih Dawh An Si"

Leave a comment

Your email address will not be published.


*


error: Content is protected !!