Nunzia Thlengtu Hriamnam Um Chun

Zei miphun poh nih misual le mittha lo nun thlennak caah hronak le hremnak hi an hman dih ciomi a si. Vawlei tuanbia ah philh awk a ttha lomi Roman pennak, Babylon pennak le Assyria pennak hna an tthawnnak cu zeitluk in dah mihrem an thiam i ttih an nun, ti in tah an rak si. Nihin tiang zongah minung kan lungput cu “a ka ttih ahcun a nunzia aa remh lai” ti peng a si ko rih hih.

Pastor pakhat nih a nupi cu tthutden hna a chuih hnawh i “cei taktak in dawh kan velh ko lai” a ti tawn. Khuahngal nih “ziah, pastor pi nih hi ti hin na nupi hi na hro i na tlerhkhonh lengmang?” tiah an hal. An nih nih “a ka ttih lo ahcun ka cungah kai te sual lai” tiah a leh hna.

Hringtu nu le pa hna fale cung kan lungput zong cu bantuk cu a si peng ve ko rih. Ka fa nih a ka ttih lawngah a nunzia aa remh lai, timi ruahnak nih a kan hruai. Nu pakhat nih “kan fale cu an tthatnak ding a si ahcun thah hmanh kan thah hna ding a si” tiah a rak ti.

Minung pakhat nunzia chiahru in nunzia ttha ah i thlen le i remh nak ding ahhin velh, hro, tuk, tlerhkhonh hi hriamnam ttha bik ah minung nih kan ruah peng ko rih. Hi zawnte ahhin, Pathian he kan ruahning aa kalh ngaingai! Kan Pathian hi Bible hmun cheukhat ahcun, “ralkap buu Bawipa” tiah auh a si. A sullam cu “a kut tangah ralkap rel cawk lo a ngeimi ral bawi ngan taktak a si” tinak khi a si.

Bible hmun cheu khat ve ahcun kan Pathian hi kangh a hmangmi meizik le kaphnih har vainam bantuk a si, tiah a ti. A sullam cu, ttih a nung lawlaw, tinak khi a si ko. Cu tluk cun kan Pathian cu ttih a nungmi a si. An nih cu, mi nih ka ttih hna seh, tiah ttihnung mi sinak kha a cawn chommi a si ve lo; a sinak hrimhrim kha ralkap bawi le meizik bantuk in ttihnung mi a si!

Cu tluk in ttihnung a simi kan Pathian nihcun, misual, mifir, le mitthalo hna kan nunzia thlen le remh a kan timh tikah, ttihnung Pathian a sinak pakhat hmanh a hmang lo. “Nan ka zumh lo ahcun kan tuk dih hna lai; nunzia dawh tein nan nun lo ahcun kan thah dih hna lai” ti bantuk in kan ti sehlaw, ahohmanh nih zum loin kan rak um ngam hnga lo.

Sihmanhsehlaw cu bantuk in tukvelh le hrinhronak ttih ruang i nawlngaihnak nihcun minung nunzia taktak a thleng kho lo, timi a hmuh caah kan Pathian nih cucu kan nih misual kan nun thlennak ding caah a hmang duh lo; a thiam tuk nain!

Misual le mitthalo hna kan nun thlennak ding caah Pathian nih a hmanmi hriamnam cu “dawtnak” tu a si. A mak ngai! Pathian dawtnak lawnglawng nih misual le mitthalo hna kan nun ah thlennak taktak a chuahter khawh! Amen!! Cu dawtnak hriamnam hmang cun, kan kiangkap ah a ummi misual le mitthalo vialte an nunzia le lungput thlenter dih khi kan Pathian nih ttuanvo a kan pekmi cu a si.

Innchungkhar ah pa nih ka nupi le fale an nunzia i remh hna seh, tiah kan tlerhkhonh hna i kan hro tawnmi hna kha hriamnam dik lo hman a si; nupi le fale nun a thleng bal lai lo! Pale hna nih dawtnak hriamnam tu hmang cang hna u sih!

Nu nih kan pasal le fale nunzia i remh hna seh, tiah phunzai le tlawhciar hriamnam kan hman tawnmi hi a dik lo; pasal le fale nun a thleng kho bal lai lo! Tlerhkhonhnak, velhnak le hronak hriamnam a hmangmi chungkhar cu thlennak siloin rawhralnak tu nih a dawi zungzal hna!

Khrihfabu zong ah members nunzia i thleng seh, tiah sikcaak, le warning peknak hriamnam a hmangmi hruaitu an umnak hmun ahcun thlarau nau an rawk tawn. Dawtnak hriamnam a hmangmi khrihfabu tu khi a dammi an si deuh!

Rampi uknak zong ah meithal he tlerhkhonhnak le tthihphaihnak in midang nunzia le lungput thlenter a timtu phu khi, ram hrawktu an si zungzal ko lai. Khah, ka bia sau cang. Ka ngol lai. Kan nih cu dawtnak hriamnam dah ti lo zeidang hriamnam hmanh hmang bak hna hlah u sih mu. Dawtnak nih a thlen khawh lomi nunzia ttha lo a um lo hih; hriamnam dang poh cu hrawktu tu an si khah!

Lawmhnak he, Hram Bik Lian

Be the first to comment on "Nunzia Thlengtu Hriamnam Um Chun"

Leave a comment

Your email address will not be published.


*