Pu. Hawi Tin Chin MP a luatnak cu Pu. Siang Bawi nih Pathian le Keimah thawng a si tiin a chimh. A hman ve ngai hi ta

Pu Hawi Tin cu pakhatnak ah Pathian thawng le Pahnihnak ah keimah thawng in a luat. Ho hmanh nih a luat lai an ruah khawh lo lio ah Ka thiamnak Level Two in ka chanhchuah. Ka ca a rel tawnmi nih cun mi sawhsawh ka si lo nan hngalh ko lai. Kawlmi caah Saya Jaw Kyi, Takhin Kotawhmain te pawl cu an phun tung tu taktak khi an si. Hi hna pahnih nak in a let zakhat in ka fim deuh i, cațial zong ka thiam deuh. Hi hna pahnih an cațial pawl rel tikah zei ngai ngai a si lo. Mirang uk lio i Kawl lungput, sallungput kha an sawi i, an volhpamhnak sawh a si. Sianginn cawn ding ah Kawl cathiam pawl nih an milh piak hna.Hi kong zong ah an mah nak in a let tam pi ka țial cang pin ah ka țialmi pawl zong an tha deuh. An nih cu fimnak le phunțanhnak lawng an ngei nain kei cu Fimnak le Phunțanhnak ka ngeih pin ah Power le Thiamnak ka ngeih rih. A poinak pakhattu cu kan careltu nan si. Kawl cu capar le cauk tlaihchanmi le rel zong ah pemh aa fawih mi an si. Laimi hi tuhmui deuh aa ziakmi kan si tikah cabia he ka i hlat tuk. Fimnak dik kan pemh loh. Cațialmi kan i fiang zau kho lo. Fimnak țenge sauh le kauh zia kan pemh lo. A zei dang cu chim lo Facebook ah a mah photo aa tar lomi cu Fake kan hei ti colh, Sui le Lung hmanh kan thleidang kho ti lo. Mirang nih Whistleblowwer, anonymity, pseudonym tibantuk an hmannak hmanh nan pemh lo teh. Fake cafang fonh hmanh thiam loin Fact a timi nan tam chap bei. Aa ralkahmi sullam a ngei.

Ca ka țial ahcun lungvar sawh hmanh si loin Diomand cabia an si. Nain Vok kan tam tuk caah, phiang kum dah ti lo cun ca țial kaa tim ti lo. Pu Hawi Tin hi a pakhatnak ah Pathian thawng in a luat. A pahnihnak ah keimah thawng in a luat. A luatnak ding caah a kapkap in aa zuammi an tam pi cio ko. A si nain a ho hmanh nih an cawlcanghnak le a luat ko lai tiah an in chim kho hna lo. A ngamh zong an ngamh lo. Kei mah lawng nih Tun Myat Naing ka doihnak kong kan chimh hna. Kan hnu December thla chung bak ah khan ka thiamnak Level 1 ka hman lai ka ti. An chuah lo cun Level two kan hman lai i, chuah lo awk a tha ti lai lo ka ti. Level Two in ka chanhchuahmi a si. Zapi nih cun a thi ko lai tiah nan ruah. An chuah ti bal lai lo tiah mitampi nih an ruah. Nai te tiang zong ah AA nih cun kan thlah hrim hrim hna lai lo tiah thawng an thanh rih. Asinain zei an va chim zong ah a biapimi cu keimah bia kha a si. Ka bia ning lawng in thil a kal lai ka ti bal cang khah. A hlei khun in AA hei ti kong țukțak ahcun ka bia leng in zei hmanh a cang lai lo. Laimi nih nan uar ngaimi pitar mitcaw nu bang cu a thi diam cang nain a chimmi pawl a tling lai tiah a zummi nan tam ngai rih. A ni caan zong zei hmanh fiang in a chim kho lo. Hmai lei ah a ti sawh! A taktak ahcun mah Pitar nu nak in zei dang cu chim lo, a pahrang, aa thiam bikmi Hmai lei kong hmanh ah a mah nak in a let zakhat in ka hngal rih. Aizawl nak in Hakha a thancho deuh te lai nak zong nikum ah ka țial bal cang khah. Zapi nih cun Lunglei hmanh a phan kho lai lo nan ti khah. A ngai ngai ah a tu dirhmun ahcun Aizawl cu Hakha lawng nih a phanh lo si loin Kawlram State dang capital cio zong nih an phan hlei ve lo ka ti bal i a sawh duhmi cu Aizawl kha Hakha nih a lonh khawh lo ahcun Kachin Myitkyina zong nih a lonh kho lai lo tinak a si i, chim sawh men si loin, Logical taktak, zohtih um tak in Kachin Lunghring tum li-nga hmanh nih Aizawl tei aa fawih tuk ding a si ko nain lawlawse kan dir hmun ruangah kan tei rih hna lo nak a si i, hmailei kumtampi rau lo teah kan tei hrimhrim lai nak zong ka langhter bal. Capar he logic niilaan ciah taktak bak in ka țialmi pawl zong an um ko khah. Hi ka ahcun a tawinak te a si caah mitam deuh nih cun caparpi i piangpup țialmi hmanh nan pemh lo ahcun a tawinak chin cu nan pemh lo ding ka fian ko. Zei ti awk țha.

AA nih Paletwa ah a hmunmi Ralhruang ser an thok cang nak zong ka rak tial. Zei tin dah kan i kham lai timi pawl zong ka țial. Nain zapi ruahnak ahcun AA cu nikum fur lio ah khan cimit ding in nan chim. Pathian nih Israel mi pawl an cung ah a tlung ding cu Prophet hna hmang in a chimh hna i hrialnak le i vennak lam zong a chimh chih zungzal hna. Ka ca taktak a rel mi nih cun a cang ding kong sawh si loin i vennak le hrialnak lam fawifawi le lamthațha piangpup in ka chim zungzal nan hmuh ve lai. Cathar le cadang tial kaa tim ti lo. Ka țial cia mi vialte kha cu nan zumh zong zumh lo zong ah ka țial ning in an cang dih ko lai. Micheu nih zumh nan i fawih deuh nak ding caah tiah Myanmar Idol kong zong ah Top 5 tiang hmanh a kai kho te hnga maw tiah nan zumh lo mi Esther kong ah a kainak ding ka tial pin ah ka power ka hmannak zong ka țial bal khah. Esther zong hi Pathian thawng le keimah thawng in Winner a hmu tiah a ngah ko nain ka ti thawng in zei hmanh ka miak ding a um lo caah a si. A ho hmanh nih nan ka zumh ding a si lo zong a fiang ko i, Jesuh hmanh nih khuaruahhar phun phun a tuah ko nain judah mi nih cun an zum lo. Vawlei a nun lio hrim ahcun ho hmanh nih an cawisang duh lo teh. A thawhthan hnu lei pi lawng ah tlawmtete in zumtu an um.
Ka chimmi zei dang cu chim loin, ting thongkhat cung lei in a rummi ka si, ka ti mi sawh hmanh micheu nih cun an zum lo. Ting thong zei zat tiah țihciah deuh in chim chin ning law an zum lo chin hnga. Hehehehe. Fim cuh ngai in a tu ka țialmi hmanh ah hin ka palhnak lawng te a hmu mi nan um lai. Nan ka ti nak ding zong ka hngalh cia dih. Nain Like zong, Comment zong a pe lem lo mi zong ah ka tialmi cabia hna hi a uarmi an tam tuk țhiam. Piangtuk in ka hmuhmi le ka hngalhmi hi Laimi ka chimh ve hna lo ahcun nidongh tikah bia ceih ka si ve sual lai tiah ka chim mi a si. Chim tawk cu i hnek ngai buin ka chim ve cang i kaa dinh a hau ve cang. Lawngtlai lei an pa bik pakhat bang nih cun ka cabia pawl tampi cu Laimi cawn ding le History bak ah khumh a duh nak a ka chat bal. Daimond bia tampi chim ding ka ngei ko nain Țial tawk ka țial cang ko caah kaa din cang lai

Be the first to comment on "Pu. Hawi Tin Chin MP a luatnak cu Pu. Siang Bawi nih Pathian le Keimah thawng a si tiin a chimh. A hman ve ngai hi ta"

Leave a comment

Your email address will not be published.


*


error: Content is protected !!