Rev. NC Thawng Tha Thang cu Chinmi nih kan ttuan khawh bal rih lo mi ah ttuanbia a kan ttial piak cang

Myanmar Football Federation (MFF) Congress ah Chinmi nih kan tuan khawh bal rih lo mi le Chinmi lak ah a hmasa bik Executive Committee (EC) chungtel ah Rev. NC Thawng Tha Thang @ Pastor TT cu January 30 ah thim in fehter a si cang, tiah kan theih.

Hi EC thimnak hi kum 4 dan ah voi khat tuah mi a si. MFF hi Myanmar ram pumpululh lei ah nawlngeihnak sang bik a ngeitu an si. Tutan thimnak ah pumpululh celhphu 20 in minung 4 lawng thim ding an si i cu chung ah Chinland FC President Rev. NC Thawng Tha Thang cu thim a si.

“Chinmi nih kan tuan khawh bal mi a si lo i atu bantuk in ka hmuh khawh mi hi Pathian dawtnak thawng in a si. Cun, ka pa, Bishop Dr. CK No Chhum thlacampiaknak thawng in a si ca ah kaa lawm tuk. Myanmar rampum huap in Chinmi zaanglek zuam mi hna kan langh khawh deuh nakhnga le hmai kan nawr khawh deuh nakhnga kaa cuh mi a si bantuk in teinak zong ka hmuh taktak. Ka si khawh chung in kaa zuam lai. Chin mino tampi ca ah thathnemnak chuahpi khawh kaa zuam lai. Zaanglek a zuam mi mino tam deuh in sersiam khawh kaa zuam lai,” tiah Rev. NC Thawng Tha Thang nih The Hakha Post ah a chim.

Rev. NC Thawng Tha Thang @ Pastor TT cu MFF EC chungtel minung 19 lak ah aa tel i, kum no bik zong a si. Amah hi Believers Church Myanmar ah General Secretary le Chinland FC ah President a tuan lio mi a si. Ref: Hakha post

Be the first to comment on "Rev. NC Thawng Tha Thang cu Chinmi nih kan ttuan khawh bal rih lo mi ah ttuanbia a kan ttial piak cang"

Leave a comment

Your email address will not be published.


*


error: Content is protected !!