Sangau Khua YLA I Ca An Chuah Mi Cu Kyaw Kyaw A Farnu Nih A Cohlang Kho Loh

Mizoram Lawngtlai District Sangau khua i ngeihchiat nak a phan mi cu, a dai kho rih loh i ngeihchiat nak a tawng mi chungkhar zong an i lungsak kho rih loh.

Mah zong cu Sangau YLA nih Kyaw Kyaw cu kanmah i thah mi a siloh, kan velh ruangah a thi mi a siloh,lungphucawl i a thi mi a si tiah ca an chuah ruangah a si.

Sangau YLA nih Kyaw Kyaw an vuak nak ah a thi timi thawng an thanh dih hnu ah, Sangau YLA nih cun tu chun December 30 ah ca an chuah i Kyaw Kyaw cu kut an thlak tuk mi a si ko nain, kut an thlak ruangah a thi mi siloin lungphucawl ruangah a thi mi a si tiah an ti.

Asinain, Kyaw Kyaw i a chungkhar pawl nih an lung a tling kho loh. mithi ruak lo lak i thlam chung ah an char mi cu Sangau khua YLA nih palik theihter duh loin an vui. Mah cu thil an tuah mi cu phunglam ning in a si loh i mithi ruak char mi hrimhrim hi palik theih pi nak um lo cun vui khawh a si loh.

Culawng siloin Kyaw Kyaw cu lolak a riaknak thlam i an vuak hnuah nga bomb nan puahmi hmuh kan duh ti’in zantim hnupi ah ti chung an lutter.

Curuangah cun kyaw kyaw cu a khur tuk hringhran i lolak thlam chung ah an lak tak ta. Cuti cun, zingka ah a keng i vuaknak vual neh um in a thi cia in an charmi a si. Phunglam ning in a siah cun, khua ah, tlunpi in thaten bia hal ding mi tu a si.

Sangau khua YLA i ca an chuah mi lungtlin lo nak kong ah, Kyaw Kyaw a farnu Len Zing Zathang nih cun “Ka tapa cu zangfah nak nei lo bak in faktuk in nan vuak, a nunnak tiang in a liam. Minung siloin saram bantuk bak nan si.

Cu hnuah Kyaw Kyaw cu Sangau khua YLA i thah mi a silo tiah ca nan chuah chinchap hoi rih. A phunphun in bia nan kalpi i phisinnak hrang ah ca nan chuah timi cu a fiang tuk. Ka tapa a thih nak kong ah hin, kuttuar nak i a thi mi a silo ti cu a ho nih dah a chim ngam, a umnak pa maw? a thih laiah a hmu maw zei?

“Nan duhduh in bia nan thlen thluahmah sawhsawh. Nan velh nan vuak hnuah amah lawng thlam ah nan chiah ta ko mi cu zeitin dah a thih nak a ruang nan theih? Nikhat hnu nikhat nan bia nan thlen nain, ka tapa cu vuak i a thi mi cu a si ko. Bia tawi tein dih ter sawhsawh nan timh ko mi cu minung ciocio kan si. Zeitin dah vuak ruang ah a thi mi a si loh nan theih khawh?,” tiah a ti.

Credit. : Vapual Auaw

Be the first to comment on "Sangau Khua YLA I Ca An Chuah Mi Cu Kyaw Kyaw A Farnu Nih A Cohlang Kho Loh"

Leave a comment

Your email address will not be published.


*