Selena Gomez nih darling thar ngeih a tim nak kong a chimh cang ko hi

Selena Gomez cu darling thar ngei dingin ready a si cang, tiah interview a ngeihnak in theih khawh a si, tuchunniah cun, nunning thar, darling thar he a hmailen caan hman aa tim cang. Chantiluan mino nih cun, Selena Gomez hi kan theih dih ka zumh, caan saupi chung Justin Bieber he relationship an ngeih hnu ah tthennak lam lei an zulh tthan, caan saupi chung lungrawhnak he caan a hmang, a ngandamnak ruangah harnak a ton caah, pum hlainak tiangin a phan, sihmanhselaw, tuchunni ah cun, thazaang thar he a hung kir tthan cang.

October 25 ah khan, Zach Sang Show ah interview a ngei, kum saupi chung dawtnak he a rak kalpi tawnmi, Justin Bieber he tthennak an ngeih dih hnu ah lungrawk ngaingaiin um hmanhselaw, darling thar ngei dingin timhlamhnak zong a ngei cang, tiah a chim.

“Caan saupi chung darling ngei loin ka um cang, kum 2 chung hrawng darling ngei loin super single in ka um, midang caah hmuh ton har in le, chonh khawh mang loin ka um ti lai lo, kan kum nih upat lei a panh cuahmah bantukin, kan caah zeibantuk minung dah a ttha bikmi an si timi zong a vun i fiang thluahmah, cubantuk nunning le ziaza cu minung dihlak nih kan ngeihmi a si,” tiah kum 27 upa nih, interview a tuahtu Zach Sang sinah a chim.

“Mizei poah nih kan darling hmasa bik cu an sung khun in kan theih cio, a ruang cu, kan kum a no lio caah ah cun, dawtnak taktak kan rak theih lo caah a si, kanmah le mah cu biahalnak kan i tuah, dawtnak taktak a si maw tiah ruahnak lungthin kan ngei tawn, kanmah theo nih cun a ho leh piak hau loin, ummmm, dawtnak taktak a si ko, tiah ruahnak kan ngei tthan tawn, cubantuk cu, a ho poah nih an rak tawn dihmi a si ko,” tiah a chim.

Caan a liam thluahmah bantuk in kum zong nih upat lei a panh cuahmah, cucaah, thil tampi ka rak tonmi in cawnmi zong tampi ka ngei cang, dawtnak zongah harnak in daihnak ah ka um cang, tiah a chim chap. Liamcia caan tlawmpal ah khan, hla thar pahnih a vun release-mi kha kan theih cio men lai, “Lose You To Love Me” le “Look At Her Now,” timi hla hna an si, US weekly tadinca nih a langhterningah cun, Bieber he an i tthen ruangah a hla pahnih hna cu a ngeihmi an si, Selena Gomez zong nih, tthatein ka hla kha ngai ulaw, nan theihthiam dih ko lai, tiah Zach Sang cu a chimh.

Bieber le Gomez hi kum 2011 ah khan an i tong, kum 2018 ah khan an i tthen tthan, an i tthen in thla hnih hnuah, tuchunni i a nupi Hailey Bieber he hin date hram aa thawk tthan, cucaah, Gomez nih hla a release-mi, “Lose You To Love Me” nih hin, an i tthenning kong a fianter bak ko, tiah a chimmi an um. “In two months, you replaced us/ Like it was easy” timi zong Gomez nih a release-mi hla “Lose You to Love Me” ah hin aa tel.

“Justin tel loin nunning zong Gomez nih a thiam dih cang, cubantuk nunning cu, a caah ngandamnak ttha bik zong a si, tuchunni ahcun, a caah zeibantuk thil dah a ttha bikmi a si, tiah lungthin ruahnak zong a ngei kho cang,” tiah interview a ngeihnak hmun i a ummi pawl nih an chim. Credit:LaitlangThlizil

Be the first to comment on "Selena Gomez nih darling thar ngeih a tim nak kong a chimh cang ko hi"

Leave a comment

Your email address will not be published.


*


error: Content is protected !!