Thawngtha bak: Chinmi 56 nih luatnak an hmuh. Mah bantuk thawngtha hi cu an caah cung a um ti lai lo

Myanmar ram President U Win Myint nih Kawl Kum Thar philhlonak le lunglawmhnak langhter can ah thongtla minung 24,896 a luatter mi hna lak ah Chinmi minung 56 an i tel, tiah tuanvo ngeitu hna sin in April 17 zaanlei suimilaam 4:30 ah kan theih. Kalaymyo thonginn in a luat mi hna hi, Hakha in 2, Thantlang in 3, Falam in 3, Tedim in 9, Tonzaang in 10, Rih Khawdar in 3 le Khaikam in 1, an dihlak 31 an si, tiah kan theih.

“Chin Ramkulh Cozah nih motor 3 kan tuaktanpiak hna i April 17 zingka suimilaam 10:00 ah Kalaymyo lei ah motor cu a dongtu hna ding ah kan thlah cang. Kalay thonginn in anmah le an khua cio an phanh tiang thlah an si lai. A herh mi tirawl le a dangdang zong Cozah nih kan tuaktanpiak hna. Hi kong ah Penkomh-uk le Peng-uk lutlai hna, Palek, La-Wa-Ka, Ngandamnak, Meithat le Sipin tibantuk nih felfai tein an tawlrel hna. Tutan ah a luat mi hna hi an min cazin belte a fiang rih lo,” tiah Chin Ramkulh Cozah Lamsuul le Pehtlaihnak Minister Pu Sui Thio nih a chim.

Hi kong ah Chin Ramkulh Cozah Chimphuannak Nawlngeitu Sipin le Electric Minister Pu Soe Htet siseh, Social Affairs Minister Pu Pau Lun Min Thang siseh, kan chawnh hna nain khual an tlawn lio a si ca ah thawngfiang an hngal ve rih lo.

Chin Ramkulh Pehtlaihnak Zung Lutlai Pu Kham Lian Sum nih, “A luat mi hi an dihlak ah minung 56 an si ko. Asinain, Kalaymyo thonginn in a luat mi hi minung 31 lawng an si i a dang minung 25 tu hi khoika thonginn in a luat mi an si kan fiang kho rih lo,” tiah a chim.

President U Win Myint nih thonginn in a luatter mi hna hi minung 24,896 an si i, cu chung ah ramdangmi minung 87 zong an i tel. Chinmi chung in minung 56 an i tel. Minung 31 hi Kalaymyo thonginn in a si i Chin Ramkulh Cozah tawlrelnak in motor pathum in an va don hna lio a si. A dang minung 25 hi khoika thonginn in an luat ti hngalh a si rih lo.

Be the first to comment on "Thawngtha bak: Chinmi 56 nih luatnak an hmuh. Mah bantuk thawngtha hi cu an caah cung a um ti lai lo"

Leave a comment

Your email address will not be published.


*


error: Content is protected !!