Tu lio Laitlangah an cei bik Rev. Ngun Hau; Coronavirus phunglam a buar ruangah an tlaih i chuah a si tthannak kong

Hakha khuah ah kan far nih coronavirus zawtnak a ngei ruangah Laitlang kan buai dih, mi tampi nih media pawl fakpi in soisel le thangchiat an si, a ruang cu an luangtuk caah a si men lai. Natein Media pawl nih media rian a si ttin fakpi in an dir ve. Thiam ancohter ve ve hna, mah bantuk thawngpang in Laitlang a hninh lio ah thawngpang dang a vun chuak tthan mi pakhat a um

Thantlang Peng, Tlanglo khua Baptist Pastor (Pension) Rev. Ngun Hau cu COVID-19 nawl buar ruang ah Thantlang Palek nih voi hnih tiang an auh hnu ah Biaceih Zung nih thla thum thong can ai ah tangka sing 3 daan an tat a si caah a luat ti a si. Mah bantuk in phunglam hi mak an ti ngai mipakhat a si. Tangka in luat khawh a si mi phunglam an ser mi hi zeidah ruangah a si hnga?

“April 12 Thawhthan zarhpi zing ah khan Tlanglo khua Baptist Biakinn ah amah lawng thawngtha a chim. Khuami minung 30 leng anmah chuah in an hung chuak i an i pumh lio ah kan khua sii sayama nu nih hman a thlak i cunglei a theihter hna ca ah Cozah kawh auh a tonnak a si,” tiah BCJC upa Pu Ngun Za Thawng a chim.

2020 April 28 ah Thantlang biaceih Zung nih thla thum thong can ai ah tangka sing 3 daan an tat i a bia an dither cang, tiah kan theih. Hi bantuk thiamthiam in Hakha zong ah Rev. Biak Lin Thang (COTR Pastor) le Evan Tawk Uk (Australia) zong Lungtat chiah rawn ah camping March 23-30 tiang tuah timh mi cu, March 28 ah Cozah nih an lawiter hna i tuanvo ngeitu Rev. Biak Lin Thang le Evan Tawk Uk cu Hakha thong ah nihin tiang biaceih ding in an chiah hna.

“Hi hna pahnih zong hi Hakha Biaceih Zung nih voi 4 biaceih ding in an auh hna. April 30 ah zung chuak ding in a voi 5nak an auh than hna,” tiah COTR District President Rev. Chan Lal nih a chim. Rev. Biak Lin Thang le Evan Tawk Uk hi Hakha thong ah thla khat an um cang tiah kan theih.

Be the first to comment on "Tu lio Laitlangah an cei bik Rev. Ngun Hau; Coronavirus phunglam a buar ruangah an tlaih i chuah a si tthannak kong"

Leave a comment

Your email address will not be published.


*


error: Content is protected !!