USA ah um Chinmi chungah thawngpang thalo thei ding mi a tam chin lengmang; USA ah a thimi minung 61,734 an phan cang.

USA cu coronavirus zawtnak in a tuar bik le a buai bik ram a si i, rian ttuantu lei zong an lungrethei ngai i, mipi zong nawl an ngai lo tuk caah a thimi an kar thluamah lio a si. Tuni tiang minung 1,065,956 nih mah zawtnak hi an ngei cang i, minung 61,734 leng a thimi an si cang. A dam tthan mi hi 147,473 an phan ve cang.

Tu lio ah a thi tambik nak state cu New York a si i, New York ah hin minung 306158 nih mah zawtnak hi an ngei cang i, a thimi dihlak cu 23474 an phan cang.

USA ah um mi Chinmi zong mah zawtnak ruangah an buai ngai cang i, atu hi Home Quarantine a tuah mi minung hi 300 leng an si cang tiah thei a si. Minung pathum nih mah zawtnak in mual an kan liam tak cang i, a dam tthan mi fiangtein thei mi minung panga an si cang.

Mah bantuk in thawngpang a chia lio ah USA mithiam pawl zawng fakpi in mah zawtnak sii ser khawhnak ding caah lam an kawl i, thawngpang tha ngai mi pakhat cu remdesivir sii cu damlo mi caah a tha ngai i, White House nih a chim ning ah cun remdesivir si a hmangmi hna cu 30% an dam a rang deuh tiah tuchun ah white house ah a chim.

National Institutes of Health hospital ah coronavirus in a zawmi minung 397 cu phu hnih ah an then hna i, an test hna i, phu khat cu ni 5 chungah an dam i, adang phu khat cu 10 chungah an dam.

Gilead nih testnak an tuahmi hna chung in 50% cu zarh hnih chungah an dam dih tiah an chim. A zawmi chung in 65.5 cu ni 5 chungah an dam i, 53.8 cu zarh hnih chungah an dam ti a si. Gilead nih an testmi result an chuah le cang ka in Stock market cu 400 points a kai manh. Biehnaw: Xinhua News/Worldometers

Note: Ka thawngpang (tadin) ttial a rel mi vialte cungah lunglawmnak tampi ka ngei. Ka thawngpang ttialmi nan kan rel piak ruangah keimah zong thawngpang a dik mi le a hman mi ka post khawh mi a si. Atu lio ah thawngpang dik lo mi ti bantuk a tam ngai caah keimah zong ralrin tein ka mipi sin ah thawngpang ka ttial tawn. Thawngpang a dik lo mi ttial ka duh lo. Hoax/Rumor/Fake ti bantuk hi ttial ka tim lo.

English ka rel mi hi thatein source dang ka zoh hnuah mah hi cu a hman mi a si lai tiah ka ti mi hi hna hi ka miphun a si mi “Chin mi” caah ka ttial tawn. Natein vawlei cung cu tlamtlinglonak a si caah Source ka lak mi ah a hman lo mi a um ti nan theih ah cun zeitik caan poah ka theihterh ulaw keimah ca zongah ralrinnak caah a si lai i cun thawngpang a hman mi le dik mi ka thla peng khawhnak ding caah tiin zaangfah kan nih hal hna-Nuva Nun Editor

Be the first to comment on "USA ah um Chinmi chungah thawngpang thalo thei ding mi a tam chin lengmang; USA ah a thimi minung 61,734 an phan cang."

Leave a comment

Your email address will not be published.


*


error: Content is protected !!