USA cu khuaici a mui bak ko cang hi. Pathian nih President Trump dirpi hram ko se

US ah rian ngei lomi minung 26.4 milion kan phan. Kan hnu zarh chung bak lawngah minung 4.4 million nih rian ngei lomi hna bamwhnak, unemployment benefit an sawk. US tuanbia ah rian ngei lo an tam bik caan kan phan. Coronavirus ruangah cozah nih state at home le lockdown an tuah. Essential a si lomi dawr poah khar dih a si caah atu bantuk in rian ngei lomi an tamnak a si.

Coronavirus a chuah hlan February thla tiang ah hin US ah rian tam bik a ngeimi le rian ngei lo a tlawm bikmi caan kan phan. Asinain Coronavirus ruangah April thla chungah rian ngei lo tam bik caan kan phan. US Laimi tam deuh cu hmuh chom le ei chom” Pay Check To Pay Check” in riantuan mi kan ram caah rianrang deuh in business an on than lo ahcun unemployment benefit lawng cun kan income a tlawm tuk lai caah inman pek dingah harnak faak ngai kan tong kho.

Tulio hi vawleicung ah zinan hrim a man aden bik lio caan a si. Mah bantuk caan hi kan phan lai tiah hohmanh nih rak ruah chung khawhmi a si lo, asinain a hung cang taktak mi a si. Zinan cawtu an zor tuk caah atu bantuk thil a chuahnak a si,

President Donald Trump nih President a cuh lio election campaign lio tein zinan kongah middle east i Arab ram pawl kan i rinh tukmi nih middle east ram pawl cungah zeihmanh nawl kan ngeih kho hna lo pin ah an duhduh in an kan rengh tawn. Cucaah US ramchung ah zinan hrim tampi kan chuah lai i, US ah zinan khur cawhnak le zinan thianhnak in pawcawmnak rian tampi kan ser lai, middle east ram pawl zong a herh caan ah kan rengh khawh ve hna lai tiah a rak chim. A chim bantuk tein a tuah taktak. Vawleicung ah zinan hrim tam bik a chuahtu ram cu US a si cang. Cucaah US nih ramdang ah zinan cawk hau ti loin US ta lawngte hman a si caah midle east ah zinan a pong.

OPEC timi zinan chuahtu ramkomh, Organization of the Petroleum Exporting Countries hna nih zinan chuahmi tumter le zinan man rikhiah khawhmi an ngeih lo caah Saudi Arabia le Russia nih an chuah tawnmi nak tam in zinan a chuah chap. Zinan hrim a tam tuk caah zinan man cu zingzan in a hung tla. Cu lio caan ah Coronavirus nih vawlei pumpi cu a hun den chap tik ah vanlawng vialte, tilawng vialte le motor le kan hmanmi vialte an dir dih tik ah zinan a cawltu an zor tuk cang.

Hlan ahcun nikhat ah zinan hi tangki 100 million lengmang an cawk hna. Asinain atu ahcun a cawttu an zor tuk cang, nikhat ah 30 million lawng a man cang. Hlan i zinan hrim tangki pakhat i, US$ 60 in an zuar tawnmi kha atu cu negative US$ 37.3 a phan. Chim duhmi cu zinan ngeitu nih a cawtu kha $37.3 in an pek chin hna. Zeiruangah ti ahcun zinan an rak i khonmi vialte a man ti lo tik ah zinan chiahnak vialte a khat dih. A hlei in zinan chiahnak an rak i ngeih lo tik ah harnak an tong mah ruangah zinan ngeitu hna nih a cawtu pawl cu phaisa an pek chin hna.

Zinan hrim khur ah zinan hrim a phurhtu tilawng tampi zong an zinan phurhmi a thlak khawh lo caah California thlanglei rili kam ah an dir thup i, an tlar lulh ko. Zinan cu duh poah in hlonh le thlet awk a that lo caah zinan chuahtu pawl an buai taktak. President Trump zong nih press conferenec ah zinan chuahtu hna caah zinan chiahnak kan bawmh na a hau tiah a chim bal.- Salai Lairamthang

Be the first to comment on "USA cu khuaici a mui bak ko cang hi. Pathian nih President Trump dirpi hram ko se"

Leave a comment

Your email address will not be published.


*


error: Content is protected !!