USA, Maryland ah um Chinmi Pu. Za Ra nih Coronavirus ruangah an chungkhar an buai ning le an chungkhar an dam thhan ning a chim mi; Coronavirus hi i ralrin zongah i ralrin kho pen a rak si lo hi

USA ah Chinmi tampi nih mah zawtnak a ngei mi an um ti kan tial cang, natein mi tampi nih lih le hrokhrawl ttial hlah an ti lengmang. A ttialtu nih a hman mi ti kan theih fawn, Chimmi tampi caah i ralrinnak a si lai tiah ruahchan nak he ka ttial mi a si fawn caah soisel le thangchiat tampi karlakah atu zong, Pu. Za Ra nupi le amah zong mah zawtnak a ngei ning le an chungkhar dirhmun amah nih a chim mi, mi tampi caah ralrinnak le thahnem santlai a si khawhnak ding caah ka vun ttial tthan mi a si. Amah nih a chim ning tein ka ttial mi a si

Nikhat ni zinglei a si i, phone a ra, nidang bantuk si loin kan nupa in kan tho huam lo, ihnak khan dangah a it mi ka fanu nih phone cu a la i, April 11 ah coronavirus test a tuah mi ka nupi Lalpuii result cu a chuak, ka nupi cu coronavirus a ngei ti theiterhnak, thei nuam lo tuk mi kong cu kan vun thei. Kan nupa in nuam lo ngai in ihkhun in kan tho, Sibawi nih a chim mi vialte cu ka fanu sin ah ka hal i, amah hi University of Maryland, Baltimore-ah nurse a cawn lio mi a si caah a bia chim mi cu a hman mi a si lai ti kha kan nih fiang ngai i, natein ma bantuk in thawngpang kan theih ruangah thinphan thlalau tuk in um kan duh lo

A si khawhtawk in coronavirus ngeilonak ding caah kan nih zuam ve. Kan umnak state Maryland ah emrgency an phuan thawk in cozah le mithiam pawl nih an chim mi vialte cu zulh khawh kan nih zuam peng. Kan nupa in rian ngol kho kan si lo caah kut tawlnak caah everclear bur nganpi cu kan cawk i, motor chung le inn chungah kan chia i, kan chuak le lut poah ah kan hmang tawn. A tam khawh chung in kan kut kan i tawl tawn. Cun mask le thil dang a herh mi vialte cu kan tuah dih. Kan mah lei si khawh tawk in kan i zohkhen ve

Zeitindah mah coronavirus hi kan ngei?  April thla hram thawk in kan nu cu cungpi tlangrai ruangah nuam lo ngai in a rak um cang. Natein rian cu a ttuan peng ko. A rian ttuannak ah nifatin screen test an tuah peng. Takling a um ah cun inn lei ah an lawiter tthan tawn hna. Zarkhat chung cu atak ling taktak lo in rian attuan peng. Apil 6, 2020 nihnih ni zong cu a hlan bantuk in zing lei suimilam 6 ah rian lei ah a kal cang i, natein ni dang bantuk si loin a taksa a fak ngai caah ni cheu in inn lei ah a rak lawi tthan. Kei zong ka rian ttuan lio mi i din caan “standby” a si caah kan nu cu siizung lei ah a rang khawhnak in ka kal pi cawlh i, kan chungkhar siibawi cu hmuh kan nih tim. natein duty pawl nih a chungah lut an siang lo. Kan siibawi hmuh kan duh, kan damlo’ tiah ka ti zong ah phone in appointment la u tiah duty nih a kan ti. Atu mah bantuk zawtnak coronavirus ruangah kan sibawi hmuh kho lo mi cu tiin ka lung a nuam lo tak tak

Mah bantuk in nupi le damlo, taksa faktuk mi cu lenglei sibawi ( Urgent care) sin ah kan kal tthan i, Ka nupi hi kal (Kidney)  tthalo a si caah sibawi nih cun kal lei ah a zoh i, sii ( Tylenol) cu a pek, a hlan in zarkhat chung kan nih zohkhen cang i, natein a dam kho hlei lo. kan nu cu a ba tuk cang i, a zual deuh deuh i. Nithum hnuah cun Urgent care tthiam tthiam ah kan kal tthan i, kan chungkhar siibawi he Telehealth-in kan nih chawn cang i, natein sii zeihman  a kan pe hlei lo. Kan nu cu thateiin an zoh hnuah cun Pneumonia a si, sii thlen piak a hau. ni thum le ni nga karlakah cun a dam cang lai tiah a kan ti. Kan nih nuam ngai kan nupa in

Natein thil pakhat ruangah lungnuam lo ngaiin kan um, kan nu rian ttuannak hmun ah a ttuan ve mi pakhat cu coronavirus ruangah a thi ti kan theih. A rian ttuanti hawi cu a si lo, natein a rian tuannak company ah rian ttuan ve mi a si caah lungdaiin kan um kho lo. Mah lawng cu si loin keimah zong taksa fah, khu le tangfa ruangah zan ah ka hngil kho ve ti lo. Sibawi sin ah coronavirus test tuah ding in kan hal hna, natein sibawi nih chungkhar pakhat ah minung pakhat lawng test tuah ding in a kan ti. Cun Lifebridge Health-ah appointment kan tuah i, April 11, 2020 zarte ni suimilam 12:30 ah ka nupi cu coronavirus test kan tuah

Cornavirus zawtnak a lang ning- A luangcia kum ah khan atu kan zawt bantuk in kan nupa in kan rak zaw cang. cu lio ah cun ka nupi hi a tangfah lo,  cun a khuhfawn  lo. nateina tak a fak i, cun tlawmpal kit a ti, cun tisa in ka nam tawn. Cun a kaa le hnar nih rim zeihman a theih lo cun zeihman a ei kho lo. a thil ei mi poah cu a kaa lei in a rak chuak tthan, cun a ba ngai i, a thaw a chuak mi cu a rethei ngai., natein keicu nikhat lawng ka khua a sik, ka tang a fak ngai i, zan khuadei in ka khuh peng, ka ek le a dik kho lo i, zeihman ei ka duh lo, ka kaa nih zeihman a thawtnak zeihman a theih ti lo

I zohkhen ning- Ka nupi a possitive ti thawng an vun ka than mi kha ni khatni a si. a rak ka chon tu sibawi cu kan chungkhar siibawi a si lo. Siibawi nih a chim ning ah cun, mah zawtnak sii hi a um lo, ti tampi rak ding ulaw, tak faa, ek lei ah dik lo, luak chuak le tangfaa faktuk in nan um ah cun emergency in siizung lei ah nan kal lai, natein mah bantuk in nan um lo ah cun atu in ni 5 hnuah nan duh ah cun rian nan ttuan kho ko, tiin a rak ka chim. Ni hnih ni ah kan chungkhar siibawi he kan nih chawn tthan i, ka nupi cu coronavirus zawtnak a ngei cang i, cun kei le ka fa le kong cu ka hal hna i, siibawi nih kan umtu nimg kan dam lo ning kong cu a vun ka hal i, test tuah a hau lo tiin a ka chim.

thingthei tampi, Anhring le vitamin tha tha ei ding in a ka chim. cun ti a tam khawh chungin ding ding in aka chim tthan. Kan thawngpang hi kan krihfa bu nih an vun theih cangka in ding ei tha tha mi cu an vun kan pek hna, cun kan thawngpang hi ramdangah a um mi chungkhar le zumtu hna nih an vun theih cangka in fakpi in Pathian sin ah thla an kan cam piak hna. Atu cu possitive kan sinak in zarkhat a luang cang.  kan ei kaa a vun thawh ngai cang i, zeihman kan taksa ah soiselnak kan ngei ti lo. Pathian ropui chin chin ko seh. atu cu rian ttuan tthan khawh ding in sibawi sin in ca kan hmuh cang.

Mipi sin ah chim duh mi- Covid-19 nih vawlei cungcu muinak khur ah a kan lutpi tak tak cang i, a pehthluamah lai ti zong a fiang. Mit in hmmuh khawh lo mi le kut in tawn i mah hi cu coronavirus a si tiah theih khawh lo mi a si caah,  mah bantuk in thil a si caah a ho nih dah amah le mah a khamh khawh lai. Idohnak le thawnnak hmang khawh si seh law vawlei cung in thawl a si acanglai. A ttih mi paoah an fimkhur, a fimkhur mi paoh nih kai lo in an um hlei lo.  a ngei mi poah hi ralrin lo ruangah a si hlei lo. mi rum le misifak, mitha le tha lo, midin le misual, ralrin le ralrin lo zawng thei lo in a kalnak ah cun a kal lengmang ko mi coroanvirus a si. Mah zawtnak lakah hin tuah khawhmi kan ngei mi a tlawm tak tak. lengchuak lo le kut ttawl ti lo cun i zohkhenak lam kan theih mi a um lo. Mah bantuk dirhmun ttih nung tuk mi kar lakah hin Pathian nai chin chin hna u sih. Mah zawtnak hi a hopaoh nih a ngei zong ah, soisel, thangthiat lo in kan tuah khawhmi a um a si ah cun fakpi in bawmh ding in i zuam cio hna u si. fakpi in thlacam piak hna u sih, mah zawtnak hi ttih nung ngai mi a si ko natein mi tampi a zawmi a dam mi an um peng ko caah ralrin tein um le mah le tuah khawh mi ah cun i bawmh thluamah hna u si.

Note: Ka thawngpang (tadin) ttial a rel mi vialte cungah lunglawmnak tampi ka ngei. Ka thawngpang ttialmi nan kan rel piak ruangah keimah zong thawngpang a dik mi le a hman mi ka post khawh mi a si. Atu lio ah thawngpang dik lo mi ti bantuk a tam ngai caah keimah zong ralring tein ka mipi sin ah thawngpang ka ttial tawn. Thawngpang a dik lo mi ttial ka duh lo. Hoax/Rumor/Fake ti bantuk hi ttial ka tim lo. English ka rel mi hi thatein source dang ka zoh hnuah mah hi cu a hman mi a si lai tiah ka ti mi hi hna hi ka miphun a si mi “Chin mi” caah ka ttial tawn. Natein vawlei cung cu tlamtlinglonak a si caah Source ka lak mi ah a hman lo mi a um ti nan theih ah cun zeitik caan poah ka theihterh ulaw keimah zong nih ralrinnak caah a si lai i cun thawngpang a hman mi le dik mi ka thla peng khawhnak ding caah tiin zaangfah kan nih hal hna-Nuva Nun Editor

Be the first to comment on "USA, Maryland ah um Chinmi Pu. Za Ra nih Coronavirus ruangah an chungkhar an buai ning le an chungkhar an dam thhan ning a chim mi; Coronavirus hi i ralrin zongah i ralrin kho pen a rak si lo hi"

Leave a comment

Your email address will not be published.


*


error: Content is protected !!