ZUK SUAI HMUH SAKNAAK HALKHA KHUALIPI AH AN TUAH VE CANG LAI

“Art Generation “ Zuk suai hmuh saknaak cu kan Chin ramkulh Halkha khualipi “ Amazon Private School “ ah December ni 11 in ni 13 tiang an tuah lai.

Hi hmuh saknaak hi zuk suaitu “ Rung Cin Thang Art “ nih a tuahmi a si. A mah hi zuk suai cawnnaak sianginn a kai lio ah hin a final kum 2009 kum lio ah hin an sianginn min in zuk suai hmuh saknaak an rak tuah i a tu kan Kawlram uktu bik a simi “ Awng San Suh Kyi”hmanthlaak kha kan Lai thilte he a rak suai.

Cu lio ah Suh Kyi cu thong in a chuah ka ti awk lawng a rak si. Cu a suaimi he cun zuk suai hmuh saknaak ah cun a rak i tel ve. A min a rak thang ngai i a zohtu an rak tam ngaingai. Mah a suaimi hmanthlaak te cu ka pa Rev. Haleluiah Pa Theu nih ttha te in a zoh i, hi nu hi Kawlram hruaitu a si te lai i, Chin miphun zong a kan dawt te lai tiah a rak ti i kei zong nih a si kho ko ka pa tiah ka rak ti. Mi dang zong nih an rak ti len ve.

Cu hnu kum 7 a rauh hnu ah a tu kan pi “ Aung San Suh Kyi “ cu kan kawlram hruaitu a hung si tak i kan Chin miphun Henry Van Thio cu Vice President a van peek tik ah ka pa bia phuan mi te kha a rak hman tuk tiah ka ti i PATHIAN sin ah lawmhnaak bia ka chim i aa din cangmi ka pa zong kha ka van thei ngai.

Rung Cin Thang Art hi Myanmar Agape Orphanage, Yangon ah um in fimnaak a cawngmi a si. B. A degree a lak i State School of Fine Arts zong in certificate a hmumi a si. Zuk suai lawng si lo in muittawn zong a thiam ngaingai mi CHIN miphun a daw i a ttanh ngaimi a si.

Cu ca ah a tu “ Art Generation “Zuk suai hmuh saknaak ah hin va kal cio in tha va peek ding in le ram dang lam hlat i a ummi hna zong nih mual an liam takmi hna nan chungkhar nan unau hna philh lonaak zuk tete kha suai ter khawh a si timi thawng ttha ka van in theihter hna. Keimah hmanthlaak le a suaimi zong hmuh saknaak ah ka van taar chih.

Credit: J. P. Biak Tin Sang

Be the first to comment on "ZUK SUAI HMUH SAKNAAK HALKHA KHUALIPI AH AN TUAH VE CANG LAI"

Leave a comment

Your email address will not be published.


*